«Ապրիլի 23-ին էլեկտրականությունն անջատելու և մոմերով պատուհաններին մոտենալու կոչի մեջ էմոցիոնալ բաղադրիչը շատ մեծ էր. հատկապես երբ մոմերով ենք մոտենում պատուհաններին, համազգային աղոթքի նման մի բան է ձևավորվում: Իսկ ապրիլի 24-ին Ծիծեռնակաբերդում ամեն ինչ շատ ճաշակով էր կազմակերպված և չափի շատ ճիշտ զգացողությամբ, մշակույթի գործիչների բարձրարժեք կատարումներ հնչեցին, ամեն ինչ օրվա խորհրդի տրամաբանության մեջ էր, և այդ զսպվածության մեջ փաստացի մարդկանց ներկայությունը կար»,- «Առաջին լրատվական»-ի հետ զրույցում այս մասին ասաց Գ. Սունդուկյանի անվան Ազգային ակադեմիական թատրոնի տնօրեն Վարդան Մկրտչյանը: Նրա դիտարկմամբ՝ նախկինում հայ ժողովուրդն ավելի շատ էր զոհի հոգեվիճակում, իսկ հիմա այդ կարգավիճակից դուրս է գալիս:
Համացանցում բուռն քննարկումների տեղիք տվեց լրագրող Արսեն Խառատյանի՝ ապրիլի 24-ին կատարած գրառումը, որտեղ նա նշել էր. «Հիշում ենք, պատրաստ ենք ներել, սակայն երբեք չենք մոռանա»: Շատերը չէին կիսում նրա մոտեցումը՝ ներման առումով: Անդրադառնալով ներել-չներելու վերաբերյալ բանավեճին՝ Վարդան Մկրտչյանը նշեց. «Ես պատմաբան չեմ, չեմ կարող որպես մասնագետ մոտենալ այս հարցերին, բայց որպես մարդ կարող եմ իմ տեսակետը հայտնել: Երբ են ներում, ներում ես այն ժամանակ, երբ դիմացինիդ մեջ գոնե նկատում ես զղջողական դիրքրոշում: Ես դա չեմ տեսնում մեր հարևանների դիրքորոշման ու կեցվածքի մեջ, ինչո՞ւ մենք պետք է ներենք նրանց: Այսօր տեսնում ենք Գարո Փալյան երևույթը, ոչ վաղ անցյալում տեսանք Հրանտ Դինք երևույթը, նրանք պատահական մարդիկ չեն, երևույթներ են և արտահայտում են հանրության մեծ շերտերի մտորումները: Ընդամենը օերեր առաջ տեսա, թե ինչ էր կատարվում Թուրքիայի պառլամենտում… Ներել ո՞ւմ և ինչի՞ համար:
Մենք չենք կարող փոխել հարևաններին, պետք է հաշվի նստենք նրանց հետ, և, կարծում եմ, հաշվի նստած ենք: Այն պահին, երբ հայ մարդը, հաղթահարելով իր քրիստոնեական նկարագիրը՝ սովորեց հակահարված տալ և շատ ավելի ամուր կանգնել, և դա եկավ իր կենսափորձից, դրանից հետո թուրքերն էլ շատ բան հասկացան:
Ապրիլյան պատերազմի չորս օրերն էլ շատ բան ցույց տվեց նրանց: 18 տարեկան հայ տղաները չնահանջեցին: Այսինքն՝ գործ ունեն տեսակի հետ, որը չնահանջել գիտի. և այդ տեսակի հետ հաշվի են նստում: Մեր հարևանները գոնե իրենք իրենց մեջ այսուհետ հաշվի են նստած»:
Մանրամասն՝ տեսանյութում:
