Ճապոնիայի նախարարների կաբինետը՝ վարչապետ Սինձո Աբեի գլխավորությամբ, փետրվարի 14-ին հավանություն է տվել պահուստային ֆոնդից միջոցների օգտագործմանն այն միջոցառումները ֆինանսավորելու համար, որոնք ուղղված են նոր կորոնավիրուսի տարածման դեմ պայքարին: Այդ մասին հայտնել է Kyodo գործակալությունը՝ տեղեկացնում է TASS-ը։
Նախաձեռնության շրջանակում գործի է դրվելու 10,3 մլրդ իեն (94 մլն դոլար): Այդ միջոցները, որոնք կօգտագործվեն առաջին հերթին երկրի ներսում կորոնավիրուսի տարածումը կանխելուն միտված միջոցառումների համար, 15,3 մլրդ իեն (շուրջ 139 մլն դոլար) ընդհանուր գումարի ֆինանսական օգնության առաջին փաթեթի մաս են կազմում, որը փետրվարի 13-ին հաստատվել է Ճապոնիայի կառավարության կողմից:
Նախօրեին երկրի խոշորագույն թերթը՝ Yomiuri-ն, տեղեկացրել է, որ կաբինետը մտադիր է շտապ ֆինանսական օգնություն ցույց տալու համար ընդհանուր առմամբ 500 մլրդ իեն (ավելի քան 4,5 մլրդ դոլար) հատկացնել այն փոքր ու միջին ձեռնարկություններին, որոնք դժվարին կացության մեջ են հայտնվել Չինաստանում կորոնավիրուսով պայմանավորված համաճարակի պատճառով:
Հրատարակության տեղեկություններով՝ աջակցություն կցուցաբերվի նաև հյուրանոցների տերերին, որոնք քիչ վնասներ չեն կրում չինացի զբոսաշրջիկների թվի կտրուկ կրճատման պատճառով: Նոր կորոնավիրուսով վարակվածների ընդհանուր թիվը Ճապոնիայում ներկա դրությամբ հասել է 251 մարդու: Նրանց մեծամասնությունը Diamond Princess ամերիկյան ճամփորդանավի ուղևորներն են ու անձնակազմը, նավ, որը կարանտինի մեջ է գտնվում ճապոնական Իոկոհամա քաղաքի նավահանգստում։
