Ամերիկացի հանրահայտ ռեժիսոր Մարտին Սկորսեզեն Rolex-ի հատուկ նախագծում պատմել է, թե մասնագիտություն ընտրելու հարցում ինչ ազդեցություն է ունեցել իր պատանեկան հանդիպումն ամերիկահայ պրոֆեսոր Հայկ Մանուկյանի հետ:
«Ես ապրում էի Էլիզաբեթ փողոցում, բայց երբեք Ուեսթ էնդում չէի եղել։ Մի անգամ հասա Էլիզաբեթի ու Հաուսթոնի խաչմերուկ, թեքվեցի ձախ, անցա մոտ վեց թաղամաս և հայտնվեցի մեկ այլ տիեզերքում», – հիշել է Սկորսեզեն։ Նրա խոսքով՝ այնտեղ նա առաջին անգամ տեսել է Նյու Յորքի Արվեստի և Գիտության քոլեջը, որտեղ դասավանդում էր Հայկ Մանուկյանը:
«Այնտեղ մի մարդ կար, որն այնքան կրքոտ ու էներգիայով էր խոսում կինոյի մասին, ասես քարոզիչ լիներ։ Եվ ես դարձա այդ պաշտամունքի անդամ: Նրա անունը Հայկ Մանուկյան էր: Նա ոգեշնչում էր մեզ: Նա մեր սրտերում կրակ վառեց», – պատմել է հայտնի ռեժիսորը՝ հավելելով․ «Եվ ես ինքս ինձ ասացի, որ սա այն տեղն է, ուր ուզում եմ գնալ: Ես ուզում եմ նրա մոտ սովորել»:
Նշենք, որ Մանուկյանը Սկորսեզեի առաջին հաջողված լիամետրաժ «Ո՞վ է թակում իմ դուռը» ֆիլմի համահեղինակն է, բացի այդ կինոռեժիսորն իր ուսուցչին է ձոնել իր մեկ այլ հաջողված ֆիլմը՝ «Կատաղած Ցուլը»:
