«Ես բազմիցս նշել եմ՝ որևէ հակասություն կամ լարված իրավիճակ չկա: Եղել է ակտիվ քննարկում, որոշակի դրույթների հետ կապված եղել են անհամաձայնություններ, որը քննարկվել է, եկել ենք ընդհանուր հայտարարի և շարժվել ենք առաջ: Գլոբալ հակասության մասին խոսք լինել չի կարող»,- «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Նարեկ Զեյնալյանը՝ անդրադառնալով առողջապահության նախարար Արսեն Թորոսյանի գրառմանը: Հիշեցնենք, որ Արսեն Թորոսյանը գրել էր, որ 7-րդ գումարման ԱԺ աշխատանքների ընթացքում գրեթե չի եղել որևէ նախաձեռնություն առողջապահության նախարարության կողմից, որը «չքննադատվի» պատգամավոր Նարեկ Զեյնալյանի կողմից: Արդեն չեմ էլ հիշում դրանց թիվը` մարդու պապիլոմավիրուսի պատվաստում, ուռուցքաբանության ծրագրում փոփոխություններ, գլխուղեղի կաթվածի ծրագիր, սանավիցիա, ծննդօգնության ծառայությունների բարելավում, բուժհիմնարկների կառավարման հարցեր, հակածխախոտային միջոցառումներ, դեղերի մասին օրենք և այլն: