Թբիլիսիի նախկին քաղաքապետ, ընդդիմադիր «Եվրոպական Վրաստան» կուսակցության առաջնորդներից Գիգի Ուգուլավան երեք տարվա և երկու ամսվա ազատազրկման է դատապարտվել ավելի քան 48 միլիոն լարիի (գրեթե 16.8 միլիոն դոլար) յուրացման գործով, հաղորդում է Sputnik Georgia-ն:
Դատավճիռը կայացրել է Վրաստանի Գերագույն դատարանը՝ Ուգուլավային մեղավոր ճանաչելով լիազորությունները չարաշահելու մեջ: Ըստ նրա փաստաբանի, դատարանը նախկին պաշտոնյային ազատությունից զրկել էր 9 տարով, բայց ժամկետը կրճատվել է համաներման մասին օրենքով և հաշվի առնելով այն փաստը, որ նախկին քաղաքապետն արդեն երեք տարի բանտում էր մեկ այլ գործով և ազատ էր արձակվել 2017 թ.-ի հունվարին:
Ուգուլավան նոր դատավճիռն անվանել է քաղաքական և հայտնել է, որ արդեն հավաքել է ճամպրուկը և պատրաստ է բանտ գնալ:
2018-ին Թբիլիսիի քաղաքային դատարանը Ուգուլավային մեղավոր է ճանաչել լիազորությունները չարաշահելու մեջ՝ 2011-2012թթ. Թբիլիսիի զարգացման հիմնադրամի միջոցների յուրացման գործով և նրան ազատազրկման է դատապարտել 1 տարի 3 ամիս ժամկետով: Սակայն, նախկին քաղաքապետը չի ուղարկվել բանտ, քանի որ նա արդեն նստել էր ֆիկտիվ աշխատատեղեր ստեղծելու գործով: Դրանից հետո գործը քննվել է Վրաստանի Գերագույն դատարանում: