Հայաստանում դատաիրավական համակարգում ստեղծված ճգնաժամը, որն ի հայտ եկավ հատկապես 2008թ. մարտի 1-ին սահմանադրական կարգը տապալելու մեղադրանքով ազատազրկված ՀՀ երկրորդ նախագահ Ռոբերտ Քոչարյանի գործի քննության ընթացքում, մի շարք հարցեր է առաջ քաշում։ Փաստաբանները տարբեր առիթներով նշում են, որ մեր դատավորներն աշխատում են գերծանրաբեռնված, նրանց քանակը սակավաթիվ է, ուստի պետք է մտածել նոր դատավորներ նշանակելու մասին։ Նոր դատավորների նշանակումը ոչ միայն կարող է թեթևացնել դատական իշխանության բեռը, գործերի քննությունը դարձնել արդյունավետ, այլև վերականգնել նրա սասանված հեղինակությունը։ Նոր դատավորներին չեն կարող մեղադրել նախկին ռեժիմի հետ կապեր ունենալու, կոռումպացվածության մեջ։
Բարձրագույն դատական խորհրդից հետաքրքրվեցինք, թե քանի դատավոր է աշխատում այսօր Հայաստանում։ «Ամբողջ հանրապետությունում ունենք գործող 240 դատավոր, 4 թափուր հաստիք»,- արձագանքեցին ԲԴԽ-ի լրատվական ծառայությունից։
Ըստ ԲԴԽ-ի կայքի՝ այս պահի դրությամբ թափուր են ՀՀ Սյունիքի մարզի առաջին ատյանի ընդհանուր իրավասության դատարանի 1 քաղաքացիական և 1 քրեական գործերով դատավորների հաստիքները, ՀՀ Տավուշի մարզի առաջին ատյանի ընդհանուր իրավասության դատարանի 1 քաղաքացիական և Երևան քաղաքի առաջին ատյանի ընդհանուր իրավասության դատարանի 1 քրեական գործով դատավորների հաստիքները։
Բարձրագույն դատական խորհրդի նախագահ Ռուբեն Վարդազարյանը տարեվերջին իր հարցազրուցներից մեկում էլ է ուշագրավ թվեր ներկայացրել՝ նշելով, որ մեր երկրում դատավորներն աշխատում են անմարդկային, սոսկալի ծանրաբեռնվածությամբ։ Ըստ նրա՝ եթե եվրոպական երկրներում դատավորը տարվա ընթացքում կարող է ավարտին հասցնել 350-450 գործ, Հայաստանում այդ գործերի թիվը հասնում է 600-700-ի, առավելագույնը՝ 1000-ի։ Ռուբեն Վարդազարյանը նշել է նաև, որ Եվրոպայում 100.000 բնակչությանը հասնում է 21-22 դատավոր, կան երկրներ, որտեղ 100.000 բնակչությանը հասնում է 30 դատավոր, իսկ Հայաստանում այդ թիվը 6-ն է։
Հետևաբար Սահմանադրական դատարանի թնջուկը լուծելուց հետո արժե մտածել դատական համակարգում ռեալ բարեփոխումների մասին։ Միգուցե, ըստ դատական ոլորտին իրազեկ մասնագետների, արժե այդ խնդիրը լուծել դատավորների թիվն ավելացնելով՝ ի հաշիվ պետական համակարգում տրվող ճոխ պարգևավճարների։
