Լուրեր
ԱԽ քարտուղարի հայտարարությունը անլուրջ է. հեղաշրջման փորձը հանցագործություն է, ինչու քրգործ հարուցված չէ

Ազգային ժողովն ավարտեց այս տարվա առաջին քառօրյա աշխատանքը: Տպավորություն կա, որ ԱԺ-ն այդպես էլ իր բնականոն աշխատանքային հունի մեջ չի մտնում: «Առաջին լրատվական»-ի հետ քննարկման ընթացքում,անդրադառնալով այս դիտարկմանը, վերլուծաբան Հակոբ Բադալյանը նշեց. «Այս ԱԺ-ն հավանաբար որակապես ավելին անելու ունակ չէ: Այն պատգամավորները, ովքեր ունակ են ԱԺ աշխատանքներին այլ հուն հաղորդել, պասիվ են, նրանք պետք է նախաձեռնողականություն ձեռք բերեն… Մենք ունենք խորհրդարան, որի համար կարծես թե գոյություն չունեն աշխարհ և Հայաստանի շուրջ կատարվող իրադարձություններ»:

«Անտարես» հրատարակչության տնօրեն Արմեն Մարտիրոսյանի դիտարկմամբ՝ պատգամավորների մեծ մասը մոռանում է պատգամավորի իր երդումը և չի կարողանում իրեն դրսևորել որպես պատգամավոր՝ որպես ՀՀ ժողովրդի ընտրյալ:

«Վելես» իրավապաշտպանական կազմակերպության նախագահ Մարինա Պողոսյանի դիտարկմամբ՝ խորհրդարանը կտրվել է իրականությունից և «մտել է կոմֆորտի զոնայի մեջ»: «Մասնագիտական արհեստավարժության խնդիր կա,- նշեց իրավապաշտպանը:- Պատգամավորները, վերցնելով մեր վստահության քվեն, պետք է մեր պատգամները կրեն, բայց իրենք սկսել են պատ շարել, և ինչ-որ բաներ գամել վրան, ժողովրդից կտրվել են և մեր պատգամը տեղ չեն հասցնում»: Մարինա Պողոսյանի դիտարկմամբ՝ հետհեղափոխական երկրներում պատգամավորները պետք է աշխատեն գաղափարների իրականացման համար:

Անդրադառնալով խորհրդարանում շաբաթվա ընթացքում ոչ բովանդակային քննարկումներին և միջադեպերին՝ Հակոբ Բադալյանը նշեց, որ խորհրդարանը պետք է աչքի ընկնի օրակարգային հարցերի քննարկմամբ, ոչ թե ապաքաղաքական էպատաժով:

Արմեն Մարտիրոսյանը հավելեց, որ խորհրդարանում տղայական մոտեցումներ չպետք է լինեն. «Իշխանություն կրողը պետք է հասկանա, որ ինքը պետական այր է, ոչ թե «լավ տղա»»:

Անդրադառնալով ԱԽ քարտուղար Արմեն Գրիգորյանի հայտարարությանը, թե ողջամիտ կասկածներ կան, որ ՀՀ-ում հեղաշրջում էր նախապատրաստվում, որի փորձը կանխվել է, Հակոբ Բադալյանը նշեց, որ դա անլուրջ հայտարարություն է և կրում է քարոզչական բնույթ. «Հեղաշրջման փորձը հանցագործություն է, ինչո՞ւ քրգործ չի հարուցվել»:

Մանրամասն՝ տեսանյութում:

  • Դիտումներ՝ *