Այս պահի դրությամբ ԱԺ նախագահ Արարատ Միրզոյանը կառավարող թիմի ամենախոցելի և ամենավտանգավոր գործիչն է։ Թերևս այս հանգամանքով են բացատրվում նրա դեմ ուղղված և արդեն իսկ պարբերական դարձած տեղակատվական հարձակումները։ Բայց, այնուամեյանիվ, տրամաբանական հարց է առաջանում․ ինչպե՞ս կարող է վտանգավորը լինել խոցելի կամ էլ խոցելին՝ վտանգավոր, չէ՞ որ վտանգավորն ինքնին ազդեցության չափորոշիչ է։
Խնդիրը շատ ավելի պարզ է, քան մեզ թվում է։ Պառլամենտի խոսնակը կառավարող թիմի երկրորդ դեմքն է և այս կարգավիճակն էլ նրան միաժամանակ դարձնում է և՛ խոցելի և՛ վտանգավոր։
Ի դեպ սա զուտ ներհայկական դրսևորում չէ, ընդհակառակը գործ ունենք օրինաչափ երևույթի հետ, որը կարող է դրսևորվել յուրաքանչյուր քաղաքական համակարգում։
Վարչապետ Նիկոլ Փաշինյանը օժտված է որոշակի անձեռնմխելիությամբ, իսկ դա պայմանավորված է հեղափոխական սիրելի առաջնորդի և խորհրդանիշի կարգավիճակով։ Սա յուրօրինակ պաշտպանիչ շերտ է, որը վարչապետին առանձնացնում է մնացյալ քաղաքական համակարգից։ Մյուս քաղաքական գործիչները զրկված են այս արտոնությունից, իսկ սրանից հետևում է, որ նրանք անպաշտպան են և թիրախավորված։ Փաշինյանի քաղաքական սխալները կարող են փոխել միայն նրա վարկանիշը, իսկ մյուսները՝ ցանկացած սխալի հետևանքով կարող են հրաժեշտ տալ ընդհանրապես քաղաքական գոյությանն ու գործունեությանը։ Ասվածի համատեքստում Արարատ Միրզոյանը ամենախոցելին է բոլոր խոցելիների միջից, քանի որ ինչպես նշեցինք նա կառավորղ թիմի երկրորդ ամենաազդեցիկ դեմքն է և այս պահի դրությամբ իշխանության ամենահավանական ժառանգորդը։ Հենց այս երկու հանգամանքներով պայմանավորված տարբեր կողմերից պատերազմ են հայտարարել Միրզոյանին՝ ինչպես ներիշխնական, այնպես էլ ընդդիմադիր շրջանակներից։ Խնդիրը մեկն է․ Նիկոլ Փաշինյանն այլևս վտանգավոր չէ, նա արդեն իսկ քաղաքական գործունեության բարձրակետին է և ավելին՝ խորհրդանիշի անձեռնմխելի կարգավիճակով։ Ինչ-որ մի օր նա հեռանալու է և Միրզոյանի դեմ սանձազերծված պատերազմը վերաբերում է հենց այդ օրվան, քանի որ երկրորդ համարը իշխանության ձգտող բոլոր բևեռների համար դիտարկվում է որպես ամենավտանգավոր մրցակից։
Ասվածից հետևում է, որ տարբեր շրջանակներ, ինչպես հիմա, այնպես էլ ապագայում, ամեն ինչ անելու են խորհրդարանի նախագահին հեղինակազրկելու և անգործունյա դարձնելու համար։ Այս արշավը սկսել է դեռևս մեկ ու կես տարի առաջ և շարունակվելու է դեռ երկար ժամանակ։
Լուսանկարը՝ Photolure-ի
