Դեկտեմբերի 20-ին ՀՀ վարչապետ Նիկոլ Փաշինյանը մեկնելու է Սանկտ Պետերբուրգ, որտեղ նա մասնակցելու է ԱՊՀ երկրների ու ԵՏՄ անդամ երկրների ղեկավարների տարեվերջյան ժողովին, որը կարող է պատմական դառնալ: Բանն այն է, որ դեկտեմբերի 20-ին Ռուսաստանն ու Բելառուսը կարող են հայտարարել խորացված ինտեգրացիայի, այլ խոսքով՝ միավորման մասին: Ռուսաստանում ու Բելառուսում իշխանության անարյուն այս փոխանցման մասին վաղուց էր խոսվում…
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Ռուբեն Մեհրաբյանը, ԱԺ «Իմ քայլը» խմբակցության պատգամավոր Անուշ Բեղլոյանը և վերլուծաբան Գոռ Մադոյանը:
Հայաստանի համար ի՞նչ կարող է փոխել այս հավանական տանդեմը: Ռուբեն Մեհրաբյանի դիտարկմամբ՝ խորացված ինտեգրացիայի մասին հայտարարելը և այդ երկրների միավորման գաղափարը ամենևին նույն բանը չեն. «Դեկտեմբերի 7-ի հանդիպմանը Լուկաշենկոն և Բելառուսի քաղաքացիները ցույց տվեցին, որ Ռուսաստանի կողմից կլանվելու ցանկություն չունեն և նույնիսկ դիմադրելու են, եթե գործը հասնի պարտադրանքի: Իհարկե Ռուսաստանը չի հրաժարվել նեոկայսերական իր նկրտումներից…»:
«Բելառուսը մի քանի շաբաթ առաջ Չինաստանից կես միլիոնի վարկ է վերցրել և հիմա, ենթադրում եմ, որ փորձում է համակշռել Ռուսաստանից կախվածությունը: Բելառուսը և՛ քաղաքական, և՛ տնտեսական առումով շատ վաղուց խոր և ճգնաժամային կախվածության մեջ է Ռուսաստանից,- նշեց Գոռ Մադոյանը: Եվ հիմա այդ երկրների խորացված ինտեգրացիան Հայաստանի համար խորքային խնդիրներ չի առաջացնի և արտաքին քաղաքականության առումով հավելյալ ծանր բեռ չի դառնա»:
Անուշ Բեղլոյանի դիտարկմամբ՝ Լուկաշենկոյի խնդիրն այն է, որ նա պատրաստ չէ վերակազմավորել իր երկրի տնտեսությունը, դնել պրոգրեսիվ հիմքերի վրա և պատրաստ չէ գնալ ռեֆորմների: Պատգամավորի խոսքով՝ խորացաված ինտեգրացիան Բելառուսի համար այն գինն է, որ նա պետք է վճարեր Ռուսաստանի հետ 20 տարի առաջ կնքված համաձայնագրի դիմաց, որով նախատեսվում են ՌԴ կողմից արտոնություններ և օգնություն:
Որպես ԱՊՀ անդամ երկրի ղեկավար, Սանկտ Պետերբուրգում կայանալիք հավաքին մասնակցելու է նաև Ադրբեջանի նախագահ Իլհամ Ալիևը: Փաշինյան-Ալիև պաշտոնական հանդիպման հնարավորության մասին որևէ բան ազդարարված չէ: Անուշ Բեղլոյանի խոսքով՝ Փաշինյանի և Ալիևի միջև հնարավոր են իրավիճակային, ոչ պաշտոնական շփումներ: «Ադրբեջանը պատրաստվում է խորհրդարանական ընտրությունների, սևեռված են ներքին խնդիրների վրա… Այս պահին Ալիևների ընտանիքը զբաղված է նոր բուրգ կառուցելով»,- նշեց պատգամավորը:
Մանրամասն՝ տեսանյութում:
