ՆԱՏՕ-ի ինտենսիվ զորավարժությունները վկայում են, որ դաշինքը նպատակաուղղված լայնածավալ ռազմական հակամարտության է պատրաստվում: Այս մասին հայտարարել է Ռուսաստանի Զինված ուժերի գլխավոր շտաբի պետ Վալերի Գերասիմովը, փոխանցում է «Կրասնայա Զվեզդա»-ն:
Գերասիմովը, ճեպազրույցի ժամանակ ելույթ ունենալով օտարերկրյա պետությունների ռազմական կցորդների առաջ, հիշեցրել է, որ բրյուսելյան փաստաթղթերում Ռուսաստանը հակառակորդի կարգավիճակ ունի, իսկ դեկտեմբերին ՆԱՏՕ-ի գագաթնաժողովի ընթացքում հայտարարվեց, որ դաշինքի «արևելյան թև» ամրապնդող ուժեր փոխանցելու օպերատիվությունը զգալիորեն աճել է:
Գլխավոր շտաբի ղեկավարի խոսքերով, 2016 թվականից ի վեր ՆԱՏՕ-ի անդամ երկրները պաշտպանական ծախսերն ավելացրել են, ընդհանուր առմամբ, 130 միլիարդ դոլարով, իսկ մինչև 2024 թվականը նախատեսվում է այդ ցուցանիշն ավելացնել 400 միլիարդ դոլարով: Բացի այդ, տիեզերքում գերակշռություն ապահովելու համար գագաթնաժողովում որոշում ընդունվեց տիեզերական տարածքը որպես ռազմական գործողությունների առանձին ոլորտ ճանաչելու վերաբերյալ՝ ցամաքային, օդային, ծովային և կիբեր տարածքների հետ միասին:
