Brexit-ի իրականացման մասին օրինագիծը պլանավորվում է բրիտանական խորհրդարանի Համայնքների պալատի նոր կազմի քննարկմանը ներկայացնել ուրբաթ օրը՝ դեկտեմբերի 20-ին: Այդ մասին դեկտեմբերի 16-ին հայտարարել է Մեծ Բրիտանիայի վարչապետ Բորիս Ջոնսոնի պաշտոնական ներկայացուցիչը՝ տեղեկացնում է TASS-ը։
«Մենք պլանավորում ենք ԵՄ-ից դուրս գալու բիլլի հաստատման գործընթացն սկսել մինչև Սուրբ Ծնունդ, պլանավորվում է այն խորհրդարանի քննարկմանը ներկայացնել ուրբաթ օրը»,- ասել է վարչապետի դիվանատան աշխատակիցը։
Ավելի վաղ Ջոնսոնը հայտարարել է, որ Միացյալ Թագավորությունը սահմանված ժամկետում Եվրամիությունից դուրս կգա որպես մեկ ամբողջություն, Brexit-ը կիրականացվի մինչև 2020 թվականի հունվարի 31-ը: «Մենք Brexit-ը կիրականացնենք սահմանված ժամկետում, մինչև հունվարի 31-ը՝ առանց որևէ «բայց-երի», «եթե-ների» կամ «գուցե-ների»: Միացյալ Թագավորությունը որպես մեկ ամբողջություն դուրս կգա Եվրամիությունից՝ իրեն վերադարձնելով հսկողությունը, օրենքների, սահմանների, ֆինանսների, առևտրի և ներգաղթի համակարգի նկատմամբ»,- ասել է Ջոնսոնը:
