Ադրբեջանից բռնագաղթած և անօթևան մնացած 112 ընտանիքի բնակարանային հարցը պետք է կարգավորված լինի մեկ տարվա ընթացքում: ՀՀ կառավարությունը նիստում հաստատել էր Ադրբեջանից բռնագաղթած և անօթևան մնացած ընտանիքների բնակարանային խնդրի լուծման ծրագիրը՝ այս փուլով նախատեսելով շուրջ 1 մլրդ 500 մլն դրամ:
ՀՀ տարածքային կառավարման և ենթակառուցվածքների նախարարության միգրացիոն ծառայության պետի տեղակալ Իրինա Դավթյանը նշեց, որ այս փուլում ընդգրկվել են այն ընտանիքները, որոնք կան Կառավարության դեռևս ընդունված 2005 թվականի ծրագրում: Նրանք հաշվառվել են որպես բնակարանի առաջնահերթ կարիքավորներ և ապրում են ժամանակավոր կացարաններում՝ հյուրանոցներում, դպրոցներում, մանկապարտեզներում և այլն:
«Կառավարությունում դրվեց մի գործընթացի սկիզբը, որը շարունակական կլինի: Նման ծրագիր չէր իրականացվել 10 տարի և ավելի: Վերջին անգամ 2005-2008 թվականներին է փախստականների բնակարանների խնդրին անդրադարձ եղել: Սա շատ ուրախալի իրադարձություն է մեզ բոլորիս համար, հատկապես՝ այն անձանց, ովքեր 30 տարի ապրում են բավական վատ պայմաններում»,-ասաց Իրինա Դավթյանը:
«Փախստականի ձայնը» ՀԿ նախագահ Օքսաննա Մուսայելյանի խոսքով, վատ պայմաններ ասելը մեղմ է հնչում: Մարդիկ տարիներ շարունակ ապրում են անմխիթար վիճակում՝ կենցաղային տարրական պայմաններից զուրկ:
«Դա նկարագրելու չի, մարդիկ այս ընթացքում շատ դժվար տարիներ են անցկացրել, ընտանիքի անդամների թիվն է ավելացել, սակայն շարունակել են շատ փոքր տարածքում ապրել: Տարիներ շարունակ բնակարանային խնդիրը չլուծելը հետ է գցել նրանց ինտեգրացիոն գործընթացը: Այս նոր ծրագրով իրավիճակը փոխվում է, հիմա նրանք շատ ուրախ են, նույնիսկ չեն հավատում, որ դա իրականություն է»,-ասաց Օքսաննա Մուսայելյանը:
Կառավարության այս նոր ծրագրով ընտանիքներին տրամադրվելու է բնակարանային գնման վկայագրեր: Նրանցից 70-ին տրամադրվելու է 1-սենյականոց բնակարանի վկայագիր, 28-ին՝ 2, մնացածին 3-սենյականոց բնակարանի վկայագիր: 1-սենյականոց բնակարանի համար տրամադրվելու է 12 մլն դրամ: Հաշվի առնելով այն հանգամանքը, որ շահառուների թվում են միայնակ ու տարեց անձինք, և նրանք կարող է դժվարություններ ունենալ այդ գործընթացում, նախատեսվում է աջակցություն: Ծրագրով վկայագրեր են տրամադրվելու Երևանի 5 վարչական շրջաններում բնակվող փախստականներին՝ Ավան, Նորք-Մարաշ, Քանաքեռ Զեյթուն, Աջափնյակ և Մալաթիա-Սեբաստիա: Առաջնահերթ լուծում կտրվի այն ընտանիքներին, որոնք ապրում են սեփականատերեր ունեցող հանրակացարաններում: Ընտրվեցին նաև այն վարչական շրջանները, որտեղ փախստականների թիվը փոքր էր, քանի որ կար կոնկրետ գումարի չափ, որի շրջանակում պետք է տեղավորվեին:
«Կառավարության որոշման մեջ պայման է դրված, որ ծրագրում հաշվառված անձինք պետք է լինեն ՀՀ քաղաքացիներ: Նրանք, ովքեր դեռ չունեն քաղաքացիություն, պետք է ձեռք բերեն: Նման մոտեցումը ինտեգրման բարձրագույն աստիճան է»,-ասաց Իրինա Դավթյանը:
Ինչ վերաբերում է առաջիկա անելիքներին, ապա Իրինա Դավթյանը նշեց, որ կոնկրետ թվեր կդժվարանա ասել, սակայն կա քաղաքական որոշում, որ ծրագիրը շարունակական լինի: Առաջնահերթ բնակարանային կարիք ունեցող ընտանիքների ծրագրում ներառված է 895 ընտանիք, որոնցից 641-ը՝ Երևանում, մնացածը՝ մարզերում: Կառավարության նախաձեռնությամբ Երևանում հաշվառված բնակարանային կարիք ունեցող 641 ընտանիքից, փաստորեն, 112-ն ապահովվում է բնակարանով:
