«Հոկտեմբերի 27-ի հետևանքով կտրուկ շեղվեց Հայաստանի Հանրապետության քաղաքական ուղեգիծը, տեղի ունեցավ քաղաքական վերախմբավորում, և հասարակության ու պետության կյանքն ընթացավ բոլորովին այլ հունով»,- այս մասին «Առաջին լրատվական»-ի հետ զրույցում ասաց Միավորված աշխատանքային կուսակցության նախագահ Գուրգեն Արսենյանը: Հարցին՝ 20 տարի առաջ ճա՞ք էր տվել ՀՀ անվտանգության համակարգը, թե՞ քաղաքական բոլորովին, այլ պրոցես էր, Գ. Արսենյանը պատասխանեց. «Հոկտեմբերի 27-ից սկսած՝ այդ օրը տեղի ունեցածի մասին վերլուծություններ ենք անում՝ ելնելով ողբերգական իրադարձություններից՝ հարձակում խորհրդարանի վրա, քաղաքական ղեկավարության գլխատում և այլն: Մինչև հիմա Հայաստանի քաղաքական մտքի ներկայացուցիչները չեն փորձել վերլուծել այն քաղաքական գործընթացը, որը կար մինչև Հոկտեմբերի 27-ը: Մինչև Հոկտեմբերի 27-ը տեղի էր ունեցել իշխանափոխություն, բայց այն բաղկացած էր երկու մասից, որի մասին լռում ենք:
1998թ. տեղի ունեցավ իշխանափոխություն՝ Լևոն Տեր-Պետրոսյանի հեռանալով, այդ ժամանակ նրա քաղաքական թիմի կարկառուն ներկայացուցիչներից էր Վազգեն Սարգսյանը… Վազգեն Սարգսյանը այլ տեսակետ ուներ, որը տարբերվում էր Լևոն Տեր-Պետրոսյանի քաղաքական թիմի տեսակետից, և նա այլ քաղաքական հոսանքներ կրողների հետ միացավ, դարձավ նոր քաղաքական թիմի կարկառուն ներկայացուցիչներից մեկը և մասնակցություն ունեցավ Ռ. Քոչարյանի ՀՀ նախագահ դառնալու պրոցեսին, սակայն մի քանի ամիս հետո նա այդ քաղաքական թիմի հետ չանցավ ճանապարհ, հավանաբար նրա պատկերացումներում տեղի ունեցան կտրուկ փոփոխություններ, և նա 1999թ. ընտրություններին գնաց Կարեն Դեմիրճյանի հետ դաշինքով: Եվ մինչև հիմա հայտնի չէ, թե ինչ մետամորֆոզ տեղի ունեցավ, ինչ հետևություններ արեց, որ Քոչարյանի թիմի հենասյուներից մեկը լինելով՝ Վազգեն Սարգսյանը որոշեց այլ ճամբարում հայտնվել»:
Գուրգեն Արսենյանի դիտարկմամբ՝ Հոկտեմբերի 27-ի բացահայտման համար քաղաքական բարդություն չկա, կա տեխնիկական բարդություն: «Մենք չունենք ներքին «իմումիտետ»՝ պաշտպանական համակարգեր, ինչը թույլ չի տա միջամտել մեր երկրի ներքին՝ քաղաքական և հասարակական կյանքին: Մեր պետությունը պաշտպանված չէ: Մենք Հոկտեմբերի 27 ենք տեսել, բայց դասեր չենք քաղել, որ ամեն ինչ անենք, որպեսզի բացառվի նմանատիպ իրադարձությունը: Մենք ներսում անպաշտպան ենք»,- ընդգծեց մեր զրուցակիցը:
Մանրամասն տեսանյությում:
