Ոստիկանության շտաբի պետ, փոխոստիկանապետ Հովհաննես Քոչարյանին նախօրեին պաշտոնից ազատելը տարաբնույթ քննարկումների առիթ է տվել: Ոստիկանության բարձրաստիճան պաշտոնյայի փոփոխությունն ինքնին հետաքրքիր է հատկապես ուժային բլոկի ղեկավար կազմում շարունակվող փոփոխությունների շարքում, սակայն Քոչարյանի պաշտոնանկությունը հատկապես ուշագրավ լույսի ներքո է հայտնվում նրա վերջին հայտարարության ֆոնին: Հովհաննես Քոչարյանը նախօրեին հայտարարել է, որ Ոստիկանությունը համակարծիք չէ Ոստիկանության վերաբերյալ օրենսդրական նախաձեռնությանը, որը ենթադրում է ոստիկանապետի պաշտոնում համկարգից դուրս անձի, այսպես ասած, քաղաքական անձի նշանակումը: Ո՞րն է այստեղ վեճի առարկան: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Անուշ Բեղլոյանը, վերլուծաբաններ Հակոբ Բադալյանը և Սերգո Տոնոյանը:
Անուշ Բեղլոյանի խոսքով՝ ընդհանուր միտում է նկատվում պաշտոնանկությունները դիտարակել որպես նոր իշխանության հետ համագործակցության անհնարինություն և իշխանության թուլություն, սակայն դրանք շահարկումներ են: «Նոր իշխանությունն առաջին օրվանից ընտրել է զարգացման էվոլյուցիոն ճանապարհը և կադրային ջարդ չի իրականացրել»,- նշեց պատգամավորը՝ հավելելով, որ նախկինում նշանակված բոլոր այն պաշտոնյաները, որոնք հանցագործություն չեն կատարել ժողովրդի և երկրի դեմ, շարունակում են իրենց աշխատանքը: Բայց եթե ռեֆորմներն իրենց համար անընդունելի են, պաշտոնանկություններ և հրաժարականներ կլինեն»:
«Փոխոստիկանապետը քննարկվող օրինագծի վերաբերյալ մասնագիտական կարծիքից բացի՝ մտել էր քաղաքական տիրույթ, և սա կարող էր քաղաքական ղեկավարության մոտ սուր դժգոհություն առաջացնել»,- նշեց Հակոբ Բադալյանը: Նրա դիտարկմամբ՝ իշխանությունը բյուրեղանում է, և կադրային փոփոխություններ առաջիկայում նույնպես կլինեն:
Սերգո Տոնոյանի կարծիքով՝ Հովհաննես Քոչարյանի հայտարարությունը քաղաքական էր, որը չպետք է արվեր: «Իշխանությունը գնում է փոփոխության, ենթադրում եմ, որ ոչ թե ոստիկանապետ ենք ունենալու, այլ ներքին գործերի նախարար, որը լիազորությունների ավելի լայն շրջանակ կունենա»,- նշեց վերլուծաբանը:
Մանրամասն՝ տեսանյութում: