Գերմանիայի կանցլեր Անգելա Մերկելը Ռուսաստանի նախագահ Վլադիմիր Պուտինի հետ հարաբերություններում Ուկրաինայի հարցում ավելի զգուշավոր ճանապարհ է ընտրել, գրում է The Wall Street Journal-ը: Ըստ թերթի՝ Մերկելի այդպիսի գործողությունները, մասնավորապես, արտացոլում են Գերմանիայի ազգային բիզնես-շահերի պաշտպանության ռազմավարությունը և այն, որ գերմանական կողմը չի ուզում հակամարտության մեջ մտնել Ռուսաստանի հետ:
Եթե ավելի վաղ Գերմանիայի ղեկավարն ասում էր, որ Ռուսաստանը կարող է քաղաքական և տնտեսական լուրջ հետևանքների բախվել Ղրիմի բռնակցման պատճառով, ապա հիմա նա մեծ ուշադրություն է դարձնում Կրեմլի հետ ավելի ակտիվ երկխոսության անհրաժետությանը, ասված է հոդվածում:
Վերջերս Գերմանիայի իշխանությունները բազմիցս հայտարարել են, որ նրանց գլխավոր առաջնայնությունը Ռուսաստանի հետ լարվածության թուլացումն է, ոչ թե հրահրումը, նշում է պարբերականը:
Թերթը նաև բերում է հարցման արդյունքները, ըստ որոնց՝ գերմանացիների մեծ մասն ուզում է, որ Բեռլինը միևնույն հեռավորությունը պահպանի Ռուսաստանից և Արևմուտքից ու որպես միջնորդ գործի:
