Բելառուսը և Ռուսաստանը պետք է քայլ առ քայլ առաջ գնան միության պայմանագրի դրույթների իրականացման համար, սակայն երկու երկրների հարաբերություններում դեռևս «ցավոտ հարցեր» կան:
Այս մասին երեկ Բելառուսի նախագահ Ալեքսանդր Լուկաշենկոն հայտարարել է Միութենական պետության պետքարտուղար Գրիգորի Ռապոտայի հետ հանդիպմանը:
«Իհարկե, կան սկզբունքային մեծ հարցեր, որոնք մենք որոշել ենք արտացոլել միութենական շինարարության իրականացման գործողությունների ծրագրում»,- նշել է Բելառուսի ղեկավարը: Նա նաև հավելել է, որ «առանց առկա խնդիրների լուծման որևէ ծրագրերի և ինտեգրման մասին խոսելն ավելորդ է»:
Լուկաշենկոն հիշեցրել է, որ «Ռոսսելխոզնադզորի» որոշմամբ արգելվել է մոտ 80 բելառուսական ձեռնարկությունների արտադրանքի մատակարարումը ՌԴ:
«Եթե մենք նման ձևով ենք հարաբերություններ կառուցում միմյանց հետ, ապա ինչ խոսք կարող է լինել ընդհանուր արժույթի և պետությունների միավորման մասին: Նման բան պարզապես չպետք է լինի երկու երկրների հարաբերություններում», – ասել է Լուկաշենկոն:
«Կամ «հարկային մանևրը», որը մտցվեց մաքսային տուրքերի փոխարեն, որի վերաբերյալ մենք պայմանավորվել էինք, որ դրանք չպետք է նույնիսկ ԵԱՏՄ-ում լինեն, էլ ուր մնաց Միութենական պետությունում»,- հայտարարել է Լուկաշենկոն:
Նա նաև փաստել է, որ «գործնականում բնական գազի և նավթի մատակարարման բանակցությունների ժամկետներն արդեն սպառվել են»:
«Առանց այս խնդիրների լուծման, նույնիսկ մեր կողմից, ընդհանուր առմամբ, խոսելու ոչինչ չկա»,- եզրափակել է Բելառուսի նախագահը:
