«Ոչ մի տեղեկություն չունեմ և չեմ էլ ուզում պատկերացնել, թե ինչ կարող է լինել, եթե ռուս-վրացական հակասության պատճառով հայկական կողմը Լարսի անցակետում խնդիրներ ունենա։ Հիշեք 2008 թվականը ռուս-վրացական պատերազմի ժամանակ։ Կատաստրոֆիկ վիճակ կարող է առաջանալ»,- «Առաջին լրատվական»-ի հետ զրույցում ասաց Հայաստանի արտահանողների միության նախագահ Րաֆֆի Մխչյանը։ Նրա խոսքերով՝ բոլորն այսօր Լարսի մասով մտահոգություններ ունեն, բոլորը խոսում են դրա մասին, սակայն, բարեբախտաբար, դեռ հստակ ոչինչ, ոչ մի ազդակ չկա, որ կարող են Լարսում խնդիրներ առաջանալ։ «Կրկնում եմ, չեմ էլ ուզում պատկերացնել, թե ինչ կարող է լինել»,- նշեց մեր զրուցակիցը։
Մխչյանն ասաց, որ առայժմ ամեն ինչ իր հունով գնում է, մթերումները նորմալ իրականացվում են, բայց մարդիկ մտահոգ են, որ ամեն պահի կարող են խնդրի առաջ կանգնել. «Ընդ որում, խնդիրը միայն ներկայիս վիճակը չէ, ամեն տարի մենք, տարբեր պատճառաբանություններով, հենց մթերումների թեժ ժամանակահատվածում Լարսում խնդիրներ ենք ունենում։ Աստված մի արասցե, որ հիմա էլ քաղաքական պատճառներով խնդիրներ լինեն»։
Մեր դիտարկմանը՝ արդյոք այս իրավիճակում ավելի արդիական չի դառնում Լարսին այլընտրանք ունենալու հարցը, Մխչյանը պատասխանեց. «Այլընտրանքային հարց չկա։ Չկա նման բան։ Դա միֆ է»։
Հարցին՝ իսկ Աբխազիայի՞ տարբերակը․«Հենց դրա մասին եմ ասում, որ այս բոլորը միֆ է։ Չկա նման բան։ Որևէ լուրջ պրոցես չկա և չի էլ կարող լինել»։
Ինչ վերաբերում է մթերումներին, այս պրոցեսը նորմալ ընթանում է։ Մթերման առյուծի բաժինն իրականացնող «Սպայկա» ընկերությունն էլ նորմալ իր բնականոն հունով աշխատում է։ Այդ մասին նախօրեին «Հայկական ժամանակ»-ի հետ զրույցում ասել էր «Սպայկա» ընկերության կայուն զարգացման գծով տնօրեն Կարեն Բաղդասարյանը։
Հիշեցնենք, որ ապրիլի 9-ին «Սպայկա» ընկերության տնօրենի ձերբակալությունից ու կալանավորումից հետո ընկերությունը հայտարարություն էր տարածել, որ Հայաստանի՝ մոտ 80 համայնքից մթերումներ չի իրականացնելու։ Այդ գյուղերից էլ արձագանք էր եղել, որ իրենք ոչ մի մտավախություն չունեն, քանի որ կհայտնվեն այլ ընկերություններ, անհատներ, ովքեր այդ մթերումը կիրականացնեն, և դրա արդյունքում «Սպայկա»-ի մենաշնորհային դիրքը կվերանա։ «Դա հայտնի դեպքերի հետ էր կապված, երբ ընկերության աշխատանքը, հնարավոր է, պարալիզացվեր:
Հիմա ընկերությունը վերադարձել է իր բնականոն աշխատանքին, և ամեն ինչ նորմալ է: Հիմա էլ ընթացիկ բոլոր նախապատրաստական աշխատանքները գնում են, բոլոր համայնքներում համապատասխան գրաֆիկներն են համաձայնեցվում ֆերմերների հետ, արկղեր են բաժանվում, որ կարողանան հավաքեն և այլն»,- ասել է «Սպայկա» ընկերության կայուն զարգացման գծով տնօրեն Կարեն Բաղդասարյանը՝ հավելելով, որ իրենք միայն ռուսական շուկայի վրա չեն այս պահին շեշտը դնում, այլ ինտենսիվ աշխատանքներ են տանում Մերձավոր Արևելքի հետ: «Այս տարվա սկզբին, Բեռլինում մասնակցելով «Ֆրութ Լոջիստիքս» համաշխարհային ցուցահանդեսին՝ բացեցինք նաև Եվրոպայի շուկան: Մեր ապրանքները հասցնում ենք մինչև Շվեդիա, Գերմանիա, Լիտվա, Լեհաստան: Այսինքն՝ այդ շուկաներն էլ են արդեն մեզ հասանելի դարձել»,- ասել էր «Սպայկա»-ի ներկայացուցիչը։
Հայաստանի «Ագրոգյուղացիական միավորում» ՀԿ նախագահ Հրաչ Բերբերյանն էլ «Առաջին լրատվական»-ի հետ զրույցում ասաց, որ դժվար թե այս տարի մթերումների հետ կապված խնդիրներ առաջանան։ Բերքի ռեկորդային ծավալներ չկան, նորմայի սահմաններում է, որն էլ ներկայումս նորմալ, բնականոն կերպով մթերվում է։ «Սպայկան» էլ ողջ ծավալով իրականացնում է մթերումները։
