2013 թվականի նախագահական ընտրություններից հետո մի շարք կուսակցություններ, անհատ հասարակական-քաղաքական գործիչներ միացան Րաֆֆի Հովհաննիսյանին և Ազատության հրապարակում ելույթներ ունեցան։ Շատերն այնուհետև Ր․ Հովհաննիսյանից պահանջեցին կտրուկ քայլեր և դրանք չտեսնելով՝ դադարեցին նրան աջակցել:
Ր․ Հովհաննիսյանին աջակցողների թվում էր նաև փաստաբան Տիգրան Նահապետյանը: Վերջինս հանրահավաքների դադարից հետո հրապարակավ ոչ մի ելույթ չի ունեցել:
«Առաջին լրատվականը» փաստաբանից հետաքրքվեց, թե ի՞նչ կարծիք ունի կոնսոլիդացվելու նոր կոչերի մասին, դրանք իր համար ընդունելի՞ են: Մեր հարցին ի պատասխան՝ նա ասաց, որ չգիտի, թե ինչ առաջարկի մասին է խոսքը: Եթե կուսակցական՝ ապա ինքը դրանցից դուրս է․ «Իսկ ընդհանուր առմամբ, համախմբման կոչերը պետք է բովանդակություն ունենան, որպեսզի հաջողեն»:
Հետաքրքվեցինք նաև, թե գուցե, ինչպես շատերը, այնպես էլ նա հիասթափվե՞լ է ապրիլի 9-ի իրադարձություններից հետո․ «Կարծում եմ, եղածը պետք է ընդունել այնպես, ինչպես որ այն կա: Ես եղել եմ Ազատության հրապարակում՝ ունենալով ընդամենը մեկ նպատակ` ապրել իրական Սահմանադրական Հանրապետությունում: Այս նպատակին հասնելու ճամփին ամենակարևորը համարել և համարում եմ ազատ քաղաքացիական գիտակցությունը, հետևաբար, ընթացքից չեմ կարող հիասթափվել: Չեմ հիասթափվել, որովհետև համարում եմ, որ մեր պայքարը պետք է լինի ոչ թե անձանց, այլ գաղափարի համար, որովհետև քաղաքացիությունից չեն հիասթափվում, որովհետև հիասթափվել՝ նշանակում է զիջել պետության հանդեպ քո իրավունքը»:
Մեր այն հարցին, թե, իր կարծիքով, մինչև 2017-2018 թվականները արտահերթ զարգացումներ կլինե՞ն, Տիգրան Նահապետյանը պատասխանեց․ «Պնդում եմ իմ այն մոտեցումը, որ Հայաստանում պետք է պայքարել ոչ այնքան իշխանության` որպես խմբի կամ խմբակի դեմ (այն էլ՝ իր մեթոդներով), այլ մեր արժեքների և իշխանափոխության ու դրա անհնարինության մասին կարծրացած պատկերացումների փոփոխման համար: Այս գործում հաջողության հասնելու պարագայում այսօրվա կամ այսպիսի իշխանությունները Հայաստանի պետական-քաղաքական համակարգում անելիք չեն ունենա»,- եզրափակեց նա:
