«Առաջին լրատվական»-ի զրուցակիցն է Ստամբուլի «Ակոս» շաբաթաթերթի հայկական բաժնի խմբագիր Բագրատ Էստուկյանը
-Պարոն Էստուկյան, Պոլսո պատրիարքի ընտրության գործընթացը որ փուլում է, արդեն հայտնի՞ է, թե երբ են լինելու ընտրությունները։ Ի վերջո, դիմել էին նահանգապետարան, ի՞նչ նորություն կա։
-Այդ դիմումից հետո ԱԳ նախարարն այցելել է պատրիարքարան և նշեց, որ Ստամբուլի քաղաքային ընտրություններից անմիջապես հետո կարող ենք այս ուղղությամբ աշխատանքներն սկսել։ Ասաց, որ նախ պետք է պատրիարքի տեղապահ ընտրել։ Հիմա երկրի վիճակը բավական լարված է, և բոլորը սպասում են հունիսի 23-ին, երբ կընտրվի Ստամբուլի քաղաքապետը։ Դրանից անմիջապես հետո կարող ենք սկսել պատրիարքի տեղապահի ընտրության գործընթացը։ Սա հաշվի առնելով՝ համայնքային որոշ շրջանակներ մատնացույց էին անում հունիսի 24-ը համարել տեղապահի ընտրության օր։ Կրոնական ժողովը պետք է ընտրի տեղապահին։ Սակայն Արամ արքեպիսկոպոս Աթեշյանը գործը ձգձգելու մարտավարություն է ընտրել՝ ասելով, որ դեռ ժամանակ կա։ Արդեն շատ հսկա է պատկերը, որ Արամ Աթեշյանն ուզում է հնարավորինս երկար ժամանակ իր ձեռքում պահել պատրիարքի փոխանորդի կոչումը, այսինքն պատրիարքարանի վրա իր տնօրինությունը։ Եթե տեղապահ ընտրվի և այդ ընտրվածն ինքը չլինի, ապա կորցնելու է իր իրավունքները։ Մինչև հունիսի 23-ը շատ ուշադրություն չենք դարձնում այդ խնդրին, բայց հունիսի 23-ից հետո բոլորիս օրակարգը դա պետք է լինի։
-Այսինքն՝ Արամ Աթեշյանը շարունակում է իր վերահսկողությունը պահել պատրիարքարանի վրա՞։
-Այո՛, և հնարավորինս այդ վերահսկողությունը երկար պահելու մարմաջի մեջ է։
-Արդյոք Կրոնական ժողովի անդամների մեջ Աթեշյանն ունի բավարար չափով աջակիցներ, որ նորից զբաղեցնի պատրիարքի տեղապահի աթոռը։
-Մեկ անգամ արդեն այդպիսի բան եղել է, և պատրիարքի տեղապահ էր ընտրվել Գերմանիայի հոգևոր առաջնորդ Գարեգին Բեկչյան եպիսկոպոսը։ Հետևաբար, այդ խորհրդի անդամները հիմա էլ կարող են նման բան անել։
-Ունենալով Թուրքիայի իշխանությունների բարեհաճությունը՝ Աթեշյանը կարո՞ղ է ի վերջո հաջողել։
-Այլևս հստակ չենք կարող ասել Թուրքիայի կառավարության աջակցության մասին, քանի որ կառավարությունը հետզհետե նկատել է, որ Աթեշյանը ժողովրդականություն չի վայելում և կարող է այլևս նրան կողմնակից չլինել։
-Պատրիարքի ընտրությունները այս տարի, այնուամենայնիվ, կանցկացվեն։
-Սա երկար գործընթաց է, և հազիվ մինչև տարեվերջ անցկացվեն ընտրություններ։ Շուտով կկազմվի հանձնախումբ և բոլոր թեկնածուներին նորից առաջարկ կգնա՝ իմանալու նրանք առաջադրվո՞ւմ են այս անգամ, թե ոչ։ Եվ նրանք, որոնք կհամաձայնվեն առաջադրվել, կգան Ստամբուլ, ժողովրդի հետ հանդիպումներ կունենան պատարագների, հանդիպումների միջոցով, և պատվիրակներ պետք է ընտրվեն, ապա դրանից հետո պատրիարք պետք է ընտրեն։ Միգուցե Բեկչյան սրբազանը չմասնակցի այս անգամ։
-Եթե Աթեշյանը պատրիարք դառնա, առկա խնդիրները լուծում չեն ստանա՞։
-Եթե Աթեշյանը պատրիարք դառնա, հայ համայնքի մեջ մեծ վիրավորանք պետք է գոյանա, որովհետև ժողովրդի մեծամասնությունը նրան չի սիրում, և եթե պայմաններն այնպես ձևավորվեն, որ նա պատրիարք դառնա, մեծ դժբախտություն տեղի կունենա։
Լուսանկարը՝ Armeniasputnik-ի
