Մեծ Բրիտանիայի Ազգային ֆինանսական վերստուգիչ վարչությունը (NAO) հրապարակել է իր զեկույցը, որում ասված է, որ երկրի պաշտպանության նախարարաությունը, փաստորեն, 6.3 մլրդ ֆունտ ստերլինգ (10.1մլրդ դոլար) է կորցրել: Ինչպես հայտնում է Defense News-ը, ստուգման ընթացքում բրիտանական ռազմական գերատեսչությունը չի կարողացել հաշվետվություն ներկայացնել հենց այդ գումարի չափով: Միջոցները կորել են 2009-2010 թվականներին:
Վարչության տվյալներով` NAO-ն տեղեկացվել է, որ «պաշտպանության նախարարությունը չի կարող տրամադրել 6.3 մլրդ ֆունտ ստերլինգի մասին տեղեկություններ, դրանց օգտագործման վայրի ու հանգամանքների վերաբերյալ»: Նշված գումարը կազմում է գերատեսչությանը տրամադրվող 45.2 մլրդ ֆունտ ստերլինգ միջոցների 14%-ը:
Ընդհանուր առմամբ, Մեծ Բրիտանիայի պաշտպանության նախարարությունը չի կարողացել տեղեկություն տրամադրել 5.5 մլրդ ֆունտ ստերլինգի պահեստամասերի և ունեցվածքի մասին, ինչպես նաև 752 մլն ֆունտ ստերլինգի ռազմական տեխնիկայի և սպառազինության, այդ թվում` 568 մլն ֆունտ ստերլինգի հրազենի, ինչպես նաև 184 մլն ֆունտ ստերլինգի ռադիոկայանների մասին: Ավելի վաղ եղել է NAO-ի մեկ այլ զեկույց, որում խոսվել է 5,961 մլրդ ֆունտ ստերլինգի «կորցված» գումարի մասին:
Ըստ NAO-ի` այն, որ Մեծ Բրիտանիայի պաշտպանության նախարարությունը չի կարողացել տեղեկություն տրամադրել 6.3 մլրդ ֆունտ ստերլինգի վերաբերյալ, չի նշանակում, թե այն կորել է. այդ միջոցները զինվորականների կողմից կարող են ուղղակիորեն օգտագործված լինել և ընդհանրապես չլինեն գողացված: Սակայն սա վկայում է այն մասին, որ ռազմական գերատեսչությունը պատշաճ կերպով չի հետևում իր ծախսերին:
