Կառավարության հաջորդ նիստում հավանություն կտրվի ՀՀ-ում խոշոր եղջերավոր կենդանիների համարակալման, հաշվառման և գրանցման ծրագրին և ծրագրի կատարումն ապահովող միջացառումների ժամանակացույցին: Կենդանիների համարակալման համակարգի ներդրումը «կարող է զգալիորեն բարձրացնել կենդանիների հիվանդությունների վաղ հայտնաբերման, սննդամթերքի սանիտարական անվտանգության, պատվաստման ծրագրերի, կենդանիների տեղաշարժի և հավասարակշռված միջազգային առևտրի գործընթացում վերահսկողության արդյունավետությունը և հետագծելիության ապահովումը»:
«Վայոց Ձորի մարզում 2012 թվականին իրականացված խոշոր եղջերավոր կենդանիների համարակալման և անձնագրավորման փորձարկման ծրագրի արդյունքում պարզ դարձավ, որ այդ մարզում առկա փաստացի գլխաքանակը շուրջ 25 տոկոսով ավելի է հակաանասնահամաճարակային միջոցառումների պլանավորման համար ընտրված ՀՀ Ազգային վիճակագրական ծառայության հրապարակած պաշտոնական գլխաքանակից, որի արդյունքում կենդանիների շուրջ 25-30 տոկոսը դուրս են մնացել ծրագրից, ինչը հիվանդությունների առաջացման և տարածման վտանգ է ներկայացնում:
Խոշոր եղջերավոր կենդանիների մսեղիքից և ենթամթերքից ստացված արտադրանքի շուկան դարձել է ոչ կայուն: Անհրաժեշտություն է առաջացել վերականգնել այդ շուկայի կայունությունը, և դրա իրականացումը հնարավոր է միայն արդյունավետ կերպով արտադրության պայմանների թափանցիկության և հրապարակայնության, ինչպես նաև տվյալ արտադրանքի վաճառահանման բարելավման միջոցով»,- ասված է նախագծի հիմնավորման մեջ:
Նշենք միայն, որ անասունների գլխաքանակի վերաբերյալ տվյալները Ազգային վիճակագրական ծառայությունը վերցնում է մարզպետարաններին ու Գյուղնախարարությանը ենթակա հիմնարկներից:
