ՀԱՊԿ անդամ երկրների ԱԳ նախարարների խորհրդի առաջիկա նիստում, որը կկայանա մայիսի 22-ին՝ Բիշքեկում, կարող են համաձայնեցվել Հայաստանի առաջարկած փոփոխությունները կազմակերպության կանոնադրության հետ կապված: Այդ մասին գրում է РБК-ն՝ վկայակոչելով կազմակերպության երկու երկրի դիվանագիտական աղբյուրներին:
Փոփոխությունների համաձայնեցումից հետո դրանք կներկայացվեն երկրների ղեկավարների հաստատմանը, որոնք կհավաքվեն ՀԱՊԿ խորհրդի նիստում, որը կկայանա աշնանը:
Աղբյուրի հաղորդմամբ՝ Հայաստանի առաջարկած կանոնադրական փոփոխությունները ենթադրում են գործող գլխավոր քարտուղարի լիազորությունների վաղաժամկետ դադարեցման ընթացակարգի սահմանում: Հայկական կողմի համաձայն՝ այդ պաշտոնը մինչև եռամյա մանդատի լրանալը պետք է զբաղեցնի այն երկրի ներկայացուցիչը, որից ռոտացիոն կարգով ընտրվել էր լիազորությունները վայր դրած անձը:
Այժմ, հիշեցնենք, գլխավոր քարտուղարի ժամանակավոր պաշտոնակատարն է ՌԴ ներկայացուցիչ Վալերի Սեմերիկովը, այնուհետև պաշտոնավարումը այբբենական կարգով կփոխանցվի Բելառուսին։
ՌԱՀՀԿ տնօրեն, քաղաքագետ Մանվել Սարգսյանի կարծիքով՝ շատ կարևոր է, որ Հայաստանը ժամանակին իր դիրքորոշումը պնդել է և հաստատակամ մնացել իր դիրքերում. «Լավ կլինի, որ նմանատիպ իրավիճակներում Հայաստանը լինի թելադրողի դերում։ Տարիներ շարունակ եղել ենք նվաստացած վիճակում, և հիմա պետք է բերել հավասարակշռված վիճակի, ու բոլորը իրավահավասար կարգավիճակում լինեն։ Ներկայացված առաջարկությունը համապատասխանում է այս տրամաբանությանը, երբ կքննարկվի ու կընդունվի՝ կարելի է ավելի մանրամասն քննարկել»,- «Առաջին լրատվական»-ի հետ զրույցում ասաց նա։
Սարգսյանն ընդգծեց. «Ընդհանրապես բոլոր հարցերում՝ ՀԱՊԿ-ում, ԵԱՏՄ-ում, թեկուզև արցախյան բանակցություններում, երբ առաջ է քաշվում մի օրակարգ՝ պետք է մնալ այդ պնդմանը ու սկզբունքային քաղաքականություն վարել։ Հակառակ դեպքում՝ մենք կվերադառնանք հին իրավիճակին, երբ ոչ մի սկզբունք չէր աշխատում»։
Քաղաքագետի դիտարկմամբ՝ մենք այժմ տեսնում ենք, որ Հայաստանի նկատմամբ այլևս չկա նախկին վերաբերմունքը։ «Այն, որ նախկինում կար Բելառուսի, Ղազախստանի կողմից՝ գոյություն չունի այլևս, դա պարզապես սպառվել է։ Շատ կարևոր է՝ նման կարգավիճակում այդ կազմակերպությունում շարունակել մնալը Հայաստանի համար որևէ իմաստ չուներ։ Այդ կազմակերպությունը էական նշանակություն չուներ պաշտպանության ոլորտում, բազմիցս զերծ են մնացել որևէ միջամտությունից։ Բայց գոնե քաղաքական գործողություններում չպետք է թույլ տալ, որ նա դառնա մեզ վրա ճնշելու մեխանիզմ։ Հիմա մենք ճիշտ ճանապարհ ենք բռնել և պետք է այդպես էլ շարունակել»,- եզրափակեց նա։
Քաղաքագետ Ռոբերտ Ղևոնդյանի կարծիքով՝ թեպետ դրական է, որ Հայաստանի փոփոխությունների առաջարկը քննարկվելու է, այդուհանդերձ, այն հազիվ թե ընդունվելու դեպքում հետադարձ ուժ ունենա, ու մենք կարողանանք օգտվել՝ այն է ստեղծված իրավիճակում կարողանանք գլխավոր քարտուղար նշանակել. «Բայց, միանշանակ, եթե այդ փոփոխությունը լինի՝ դա կլինի եթե ոչ Հայաստանի հաղթանակը, այլ գոնե ինչ-որ բանի հասնելու քայլ»,- «Առաջին լրատվական»-ի հետ զրույցում ասաց նա։
Արդյոք այսկերպ Հայաստանը կկարողանա ամրապնդել իր դիրքերը ՀԱՊԿ-ում, մեր զրուցակիցն ասաց. «Հայաստանն արդեն իսկ իր դիրքերն ամրապնդել է։ Հաշվի առնելով այն, որ մնացած 5 պետությունները փորձում էին ժամկետից շուտ նշանակել Բելառուսի ներկայացուցչին, բայց Հայաստանի ջանքերի շնորհիվ դա տեղի չունեցավ, և մեր դիրքորոշման պատճառով այդ նշանակումը տեղի կունենա 2020 թվականին, այդ մասին վերջերս ասաց նաև Բելառուսի ներկայացուցիչը՝ խոսելով իրենց ծրագրերի մասին, ասացին, որ դա տեղի կունենա 2020-ից հետո։ Այսինքն՝ իրենք այդ մտքին ևս համակերպվել են։ Այս ամբողջ իրադարձությունների արդյունքում Հայաստանն իր դիրքերն ամրապնդել է և եթե այդ փոփոխությունները տեղի ունենան՝ դա կլինի ևս մեկ քայլ ՀԱՊԿ-ի կանոնադրությունն ինչ-որ չափով շտկելու համատեքստում»։
