Միքայել Մինասյանի եղբորը՝ Գրիգոր Մինասյանին և նրա գործընկեր՝ մարդու իրավունքների նախկին պաշտպան Կարեն Անդրեասյանին պատկանող Shabat.am կայքը ապրիլի 21-ին հրապարակել է «Իրական տերերն ու քաղաքական տանիքները. լրատվական դաշտի պատկերը Հայաստանում» վերնագրով տեսանյութ, որում ակնհայտ կեղծ տեղեկություններ է տարածել մի շարք լրատվամիջոցների, այդ թվում՝ «Առաջին լրատվական»-ի և «Ժամանակ» օրաթերթի մասին։
Թե՛ «Առաջին լրատվական»-ը և թե՛ «Ժամանակ» օրաթերթը հիմնադրման օրվանից եղել են ու կան Հայաստանում եզակի անկախ լրատվամիջոցներ։ Ի տարբերություն shabat.am-ի՝ մենք չունենք տերեր կամ ստվերային հովանավորներ և ծառայում ենք միայն ու բացառապես մեր ընթերցողների շահերին։ Խստորեն դատապարտելով ազատ մամուլի դեմ այս զրպարտչական հրապարակումը՝ պահանջում ենք հերքել այն, հակառակ դեպքում գործին ընթացք կտանք դատական կարգով։
Ցավալի է արձանագրել, որ նման բնույթի հրապարակումներ են տեղ գտնում մի մարդուն պատկանող կայքում, ով զբաղեցրել է Մարդու իրավունքների պաշտպանի պաշտոնը։
Նոր Հայաստանում նման կարգի լրատվամիջոցները չպետք է տեղ ունենան, սա հարված է ոչ միայն առանձին ԶԼՄ-ներին, այլև ազատ խոսքին ընդհանրապես։
