Ֆրանսիացի ռեժիսոր Կլոդ Լելուշը Կաննի կինոփառատոնում կցուցադրի «Տղամարդը և կինը» իր նշանավոր ֆիլմի, որը «Ոսկե արմավենու ճյուղ» է ստացել 1966 թվականին, նոր շարունակությունը: Այդ մասին մամուլի ասուլիսի ընթացքում հայտնել է կինոփառատոնի գլխավոր տնօրեն Թիերի Ֆրեմոն՝ գրում է Interfax-ը:
«Կյանքի լավագույն տարիները» ֆիլմը կցուցադրվի մրցույթից դուրս, բայց փառատոնի պաշտոնական ծրագրի մաս կկազմի: Նշվում է, որ գլխավոր դերերը կխաղան նույն դերասանները՝ Ժան-Լուի Տրենտինիանը և Անուկ Էմեն, որոնք ֆիլմում նկարահանվել են ավելի քան 50 տարի առաջ: Բացի այդ, ֆիլմում դերերից մեկը խաղացել է Մոնիկա Բելուչին: 1986 թվականին Լելուշը թողարկել է «Տղամարդը և կինը. 20 տարի անց» ֆիլմը:
Կինոփառատոնի բացման ֆիլմը կդառնա ամերիկացի ռեժիսոր Ջիմ Ջարմուշի «Մեռյալները չեն մահանում» նոր ֆիլմը. ժապավենը ներկայացվելու է հիմնական մրցույթում: Կաննի 72-րդ կինոփառատոնը կանցկացվի մայիսի 14-ից մինչև 25-ը: Ժյուրին գլխավորել է մեքսիկացի ռեժիսոր Ալեխանդրո Գոնսալես Ինյարիտուն: