«Այո՛, դա պրովոկացիա է, բայց պրովոկացիա է ոչ թե «Իմ քայլի» դեմ, այլ «Բարգավաճ Հայաստան» կուսակցության դեմ»,- այսօր լրագրողների հետ հանդիպման ժամանակ ասել է ԲՀԿ նախագահ Գագիկ Ծառուկյանը՝ մեկնաբանելով վարչապետ Նիկոլ Փաշինյանի այն հայտարարությունը, որ տրանսգենդերի հետ կապված պատմությունը եղել է կազմակերպված պրովոկացիա ընդդեմ «Իմ քայլի»:
«Առաջին լրատվականի» հետ զրույցում, անդրադառնալով այս «փոխհրաձգությանը», ԲՀԿ խմբակցության անդամ, ԱԺ փոխնախագահ Վահե Էնֆիաջյանը նշեց. «Թե ում էին ձեռնտու նման շահարկումները, վարչապետը հնարավորություն ունի կարճ ժամանակում բացահայտել… Այս պրովոկացիան ուղղորդվում էր դեպի ԲՀԿ: Քաղաքական տեխնոլոգիաներ են կիրառվում, մեզ էլ է հետաքրքրում, թե ով է կազմակերպողը: Այսօր ԱԱԾ-ի համար նման խնդիրը բացահայտելը երկար ժամանակ չի պահանջի»:
Անդրադառնալով դիտարկմանը, որ ՊԵԿ-ն այսօր այցելել է «Առինջ մոլ»՝ Վահե Էնֆիաջյանը նշեց. «Օրենքի առջև բոլորը հավասար են, անհասկանալի և անտրամաբանական է, երբ որ ՊԵԿ նախագահ Անանյանի ցուցումով շուրջ 5 տասնյակ ծառայողներ մտնում են տարածք և ստուգումների պատրվակով փորձում տարաբնույթ գործողություններ իրականացնել և մեկնաբանությունների առիթ տալ: Հնարավոր չէ՞ր այդ տարածք գային 3-4 աշխատակիցներ, պահանջեին փաստաթղթեր, որոնք պատշաճ կերպով կներկայացվեին և բոլոր հարցերի պատասխանը կստանային: Ի՞նչ խոչընդոտի են հանդիպել: Ի՞նչ է նշանակում տասնակ մարդկանցով գալ տարածք, ինչ-որ իրավիճակ ստեղծել, ինչ-որ ֆոն ձևավորել, իմաստը ո՞րն է: Ո՞րերորդ անգամն են ստուգում, ի՞նչ է փոխվում դրանից: Իմաստը ո՞րն է նման կերպ ներխուժելու:
Պարոն Անանյանը որոշ ժամանակ առաջ խոսում էր 40-50 տոկոս ստվերի մասին, ո՞ւր է այդ ստվերի արտացոլանքը: Թող իրենց խոստումների հետևից գնան: Թող իրենց ստուգումները բոլոր տեղերում իրականացնեն»:
Մանրամասն՝ տեսանյութում:
