ՀՀ ԿԱ պետական եկամուտների կոմիտեն վստահեցնում է, որ ՊԵԿ-ի հետաքննության և օպերատիվ հետախուզության վարչության աշխատակիցները ապրիլի 9-ին «Ֆիրմա Նյու» սահմանափակ պատասխանատվությամբ ընկերությունում («Առինջ մոլ» առևտրի շուկայի կազմակերպիչն է) քննչական և դատավարական գործողություններն իրականացնում են օրենքի պահանջների շրջանակներում: Այս մասին տեղեկացրին ՀՀ ԿԱ ՊԵԿ տեղեկատվության և հասարակայնության հետ կապերի բաժնից:
«Այսօր ՀՀ ՊԵԿ Հետաքննության և օպերատիվ հետախուզության վարչության աշխատակիցները` դատարանի որոշման հիման վրա խուզարկություն են իրականացնում «Ֆիրմա Նյու» սահմանափակ պատասխանատվությամբ ընկերությունում (հանդիսանում է «Առինջ մոլ» առևտրի շուկայի կազմակերպիչը): Խուզարկությունն իրականացվում է ընկերության նկատմամբ ՀՀ Քրեական օրենսգրքի 205-րդ հոդվածի (հարկը, տուրքը կամ պարտադիր այլ վճարը չվճարելը) հատկանիշներով հարուցված քրեական գործի շրջանակներում:
Պետական եկամուտների կոմիտեն վստահեցնում է, որ քննչական և դատավարական գործողություններն իրականացվում են օրենքի պահանջների շրջանակներում և, միաժամանակ, հորդորում զերծ մնալ հարկային օրենսդրության նորմերը ենթադրյալ խախտող և հարկեր վճարելուց խուսափող տնտեսվարողների (հիմնվում է ողջամիտ կասկածի վրա) նկատմամբ իրականացվող օրինական գործընթացներին քաղաքական ենթատեքստ տալուց և այդ եղանակով ՊԵԿ աշխատակիցների վրա ազդելու փորձերից»,- նշված է ՀՀ ԿԱ ՊԵԿ-ի հայտարարության մեջ:
