«Եթե ես տեսնեմ, որ կառավարությունը չի կարողանում կամ ջանքեր չի գործադրում վերաբանակցել, քայլեր կձեռնարկեմ։ Մենք պետք է փորձենք, որպեսզի մեր պետությունը մաքսատուրքի 60-70 միլիոն դոլարը չկորցնի։ Ինքս դիմելու եմ ԵԱՏՄ անդամ պառլամենտական գործընկերներին, որոնց հետ շատ լավ հարաբերությունների մեջ ենք, որպեսզի հորդորենք, որ նրանք էլ աջակցեն մեր տեսակետը ԵԱՏՄ հանձնաժողովում։ Եվ ես կարծում եմ, որ մենք անպայման որոշակի արդյունք կստանանք»,-«Առաջին լրատվական»-ի հետ զրույցում ասաց ԱԺ ԲՀԿ խմբակցության պատգամավոր Միքայել Մելքումյանը՝ անդրադառնալով 2020-ից մեքենաների՝ 4-5 անգամ թանկանալու խնդրին։
Նա նշեց, որ շուկան այսպիսով կփլուզվի․ «Ներկրվող ավտոմեքենաները, բացի նրանից, որ 15-20․000 մարդ են, որոնք ընտանիքներ են կերակրում, դրանց մի մասը վերարտահանվում են, օրինակ՝ նախորդ տարի 33․000 վերարտահանվել է, այս տարի ներկրումները 100․000-ից անցել են։ Չէ՞ որ այդ ավտոմեքենաները սպասարկվում են, ավտոմեքենաների մի մասը վնասված են, բերում են, արհեստավորները աշխատում են, մարդիկ գալիս են Ղազախստանից, Ռուսաստանից, մնում են հյուրանոցում, Տեսեք ինչքան շղթայական մուլտիպլիկատիվ էֆեկտներ կան, որ մենք կորցնելու ենք։
Այնպես որ ջանք ու եռանդ չպետք է խնայենք, որպեսզի որոշակի միջանկյալ լուծում անպայման ունենանք»,-հավելեց պատգամավորը։
