Արարատի մարզի Ավշար համայնքի միջնակարգ դպրոցում այսօր ևս դասադուլ է։ Աշակերտները դասի չեն գնացել։ Այս մասին «Առաջին լրատվական»-ի հետ զրույցում ասաց Ավշարի դպրոցի փոխտնօրեն Ռեգինա Սիմոնյանը։ Նա ասաց, որ նորանշանակ տնօրենն էլ դպրոց չի եկել, ասել է, որ դեռ մտածում է՝ գա՞լ դպրոց, թե՞ ոչ։ Դպրոցում միայն ուսուցիչներն ու աշակերտների ծնողներն են, ովքեր շարունակում են պահանջել նորընտիր տնօրեն Հերմինե Անդրեասյանի հրաժարականը. նա Արարատի մարզպետ Գարիկ Սարգսյանի ազգականն է։
Նշենք, որ շաբաթ օրը, երբ վարչապետ Նիկոլ Փաշինյանը Արարատի մարզում էր, բնակիչները վարչապետի մոտ ևս բարձրացրին խնդիրը։ Ներկա էր նաև մարզպետ Գարիկ Սարգսյանը, որը վարչապետի ներկայությամբ խոստովանեց, որ նոր տնօրենն իր մորաքրոջ հարսն է, և նշեց, որ խնդիրը լուծվելու է օրինականության սահմաններում։ Վարչապետն էլ խոստացավ ուսումնասիրել խնդիրը։
«Վարչապետի այցից հետո էլ ոչ մի բան չի փոխվել։ Հակառակը՝ այսօր առավոտյան մարզպետի բարեկամներն ու ազգականները ցուցադրական իրենց երեխաներին բերել էին դպրոց։ Հետո տեսան, որ դասապրոցես չկա, ոնց ցուցադրական եկել էին, այնպես էլ գնացել են։ Մարզպետն իր ազգականներին ուղարկել էր դպրոց, որ հարց լուծեր, բայց չստացվեց։ Նրանցից բացի՝ ոչ մի երեխա այսօր դպրոց չի եկել։ Դպրոցում միայն ուսուցիչներն են ու ծնողները։ Նրանք իրեց որոշումը չեն փոխում։ Սպասում են հարցի լուծման»,- ասաց տիկին Սիմոնյանը։
Իսկ հարցի լուծումը, մեր զրուցակցի խոսքով, միանշանակ տնօրենի հրաժարականն է։ «Քանի դեռ նա հրաժարական չի տվել, դասադուլը կշարունակվի։ Մենք հույս ունեինք, որ շաբաթ օրը վարչապետի մոտ հարցը բարձրացնելուց հետո խնդիրը լուծում կստանա։ Դրա համար էլ գիտեինք, որ այսօր որոշիչ օր է։ Բայց խնդիրը լուծում չստացավ, դրա համար էլ մենք շարունակում ենք պայքարը։ Ես զարմանում եմ՝ մի՞թե մարզպետի համար այդքան սկզբունքային է, որ Ավշարի դպրոցի տնօրենն իր ազգականը լինի։ Նա 1000-ից ավելի քվե է ստացել Ավշարից, բայց այսօր բացարձակ չի արձագանքում ավշարցիների պահանջին, չի լսում նրանց ձայնը։ Մենք չենք ուզում խնդիրը քաղաքականացնել, բայց իրենք ամեն կերպ քաղաքական հարցը բերում են դպրոց»,- ընդգծեց փոխտնօրենը։
Նշենք, որ աշակերտներն ու ուսուցիչները չեն ցանկանում նոր տնօրենի հետ աշխատել, քանի որ նա արհամարհում է ուսուցիչներին ու աշակերտներին, կոպտում, վիրավորում է նրանց, բացի այդ, բողոքավորների խոսքով, մի քանի օրվա պաշտոնավարման ընթացքում փորձել է ազատել փոխտնօրեն Գայանե Մարտիրոսյանին։ Մինչդեռ ծնողների և ուսուցիչների խոսքով՝ Գայանե Մարտիրոսյանը դպրոցի լավագույն ուսուցիչն ու ուսմասվարն է։ Տնօրենը ոչ մի պատճառ չունի նրան աշխատանքից ազատելու պահանջ ներկայացնել, այն էլ պատճառաբանությամբ, թե պետք է իր ընկերուհուն՝ Աստղիկ Հարությունյանին, բերի դպրոց՝ որպես փոխտնօրեն։
«Մարզպետը երևի որոշել է կաթվածահար անել դպրոցի աշխատանքը։ Բայց մենք կպայքարենք այնքան, մինչև արդյունքի հասնենք, որից հետո դասացուցակում, դասաժամերում փոփոխություններ անելով՝ մենք կլրացնենք բաց թողնված դասերը»,- եզրափակեց փոխտնօրենը։