«Զվարթնոց» օդանավակայանի ուղևորային հին համալիրի շենքի պահպանության համար սկսված էլեկտրոնային ստորագրությունների արշավին արդեն իսկ իրենց ստորագրությունն են դրել հազարից ավելի քաղաքացիներ:
Նախաձեռնության անդամներից ճարտարապետ Սաշուր Քալաշյանը «Առաջին լրատվական»-ի հետ զրույցում ասաց, որ իրենք այս կերպ փորձում են շենքի պահպանությանը մասնակից դարձնել ոչ միայն մասնագիտական հանրությանը, այլև արվեստասեր անձանց: Նրա համոզմամբ՝ այս ակցիային պետք է մասնակցեն բոլոր ճարտարապետները, որպեսզի կառավարությունը հասկանա, որ մշակութային արժեքների գնահատման հարցում ավելի լավ դատավոր, քան ճարտարապետն է, չի կարող լինել:
«Հիմա անընդհատ հավաքվում են ստորագրություններ, ընդհանուր առմամբ դրանց թիվն անցել է հազարից: Դրանք վերջում ամփոփելու ենք, պատճենահանելու և ուղարկելու ենք կառավարությանը»,- ասաց նա:
Ճարտարապետն ասաց, որ ստորագրությունները ներկայացվելու են նաև դատարանում՝ դատական գործի բացումից հետո. «Կարևոր քայլ է հուշարձանը պատմական հուշարձանների ցուցակում ներառելը: Եթե բոլոր ճարտարապետները համաձայնեն, ապա կառավարությանն այլ բան չի մնա, քան ընդունել մեր ասածը»:
Նա նաև հավելեց, որ մի քանի մոնումենտալ ճարտարապետական կառույցների քանդումից հետո իրենք փորձ են ձեռք բերել և թույլ չեն տա, որ «Զվարթնոցի» շենքն արժանանա Փակ շուկայի ճակատագրին. «Կառավարությունը մոլորության մեջ է, իսկ մենք փորձ ունենք, չեմ կարծում, որ հարցի լուծմանը չհասնենք»:
Նշենք նաև, որ էլեկտրոնային ստորագրահավաքին միանալու համար կարող եք այցելել հետևյալ հասցեով՝ www.change.org:
