Մարտի 31-ին տեղի կունենա «Ժառանգություն» կուսակցության համագումարը: «Ժառանգության» վարչության անդամ Սուսաննա Մուրադյանը «Առաջին լրատվական»-ի հետ զրույցում նշեց, թե օրակարգում ինչ հարցեր են ընդգրկված, արդյոք Արմեն Մարտիրոսյանը կմնա՞ վարչության նախագահ, թե՞ ոչ:
«Կուսակցությունը երկու տարին մեկ պարտադիր համագումար է անցկացնում: Փոփոխություններ կլինեն կուսակցության ծրագրի, կանոնադրության մեջ, դեռ քննարկումների փուլում ենք»,- ասաց նա՝ հավելելով. «Տեսնենք ոնց ենք դիրքավորվում քաղաքական դաշտում, զգալի թարմացնելու ենք վարչությունը, որտեղ նոր շունչ կլինի»:
Անդրադառնալով կուսակցությունում լիդերների փոփոխությանը՝ Սուսաննա Մուրադյանը նկատեց, որ «Ժառանգությունում» շատ անգամներ են առաջնորդները փոխվել, և վերջինը Արմեն Մարտիրոսյանն է, ով տևական ժամանակ Հայաստանում չէ. «Արմեն Մարտիրոսյանը չի ասում, որ հիմնական է գնացել, ենթադրում եմ, որ ժամանակավոր է, բայց դե կյանքը ցույց կտա: Այսպես թե այնպես վարչության ընտրությունը ենթադրում է փոփոխություն, քանի որ Արմեն Մարտիրոսյանն էլ էստեղ չի, բնականաբար, այլ մեկը կլինի հավանաբար: Հաստատ ինքը չի լինի, եթե մինչ այդ չգա և չցանկանա: Ինչ վերաբերում է Րաֆֆի Հովհաննիսյանին, նա շատ ակտիվ ֆորմայի մեջ է, և քննարկումներին, որ հաճախ են լինում վերջերս, ինքն ակտիվ մասնակցում է»:
Ինչ վերաբերում է սահմանադրական փոփոխություններին, «Ժառանգության» անդամը չբացառեց, որ իրենք ևս նման օրակարգ առաջ քաշեն. «Մենք ծրագրում ունեինք խորհրդարանական հանրապետության մասին դրույթ, բայց դեմ էինք 2015-ի սահմանադրական փոփոխություններին: Ենթատեքստն էլ գիտեք, որովհետև գիտեինք, թե ինչի համար է դա արվում: Հիմա եթե մենք էլ այլ ուժերի հետ մասնակցենք այդ քննարկումներին, կունենանք մեր հիմնավոր առաջարկները նաև այդ կապակցությամբ՝ հաշվի առնելով այսօրվա քաղաքական իրողությունները»:
Սուսաննա Մուրադյանը տեղեկացրեց, որ սահմանադրական փոփոխությունների վերաբերյալ տարբեր քաղաքական ուժերի հարթակի մասին տեղյակ է, բայց «Ժառանգությունն» այդտեղ շատ ակտիվ չէ. «Որ պահին մենք էլ ունենանք մեր մասնակցությունը, մեր առաջարկներով կգնանք»:
Հարցին՝ «Ժառանգությունը» կմիանա՞ վարչապետ Նիկոլ Փաշինյանի ազդարարած մարտիմեկյան երթին դեպի Մյասնիկյանի արձանի մոտ, Սուսաննա Մուրադյանը պատասխանեց. «Որպես քաղաքացի՝ ես կմիանամ երթին, «Ժառանգությունը» դեռ որոշում չունի: Մենք մարտի 1-ի օրը լինելու ենք թե՛ Մյասնիկյանի արձանի մոտ, թե՛ այն վայրերում, որոնք այդ օրվա տխուր հիշողությունների հետ են առնչվում: «Ժառանգությունը» երբ որոշում ունենա՝ կասենք»:
