Հայաստանն ունի վերականգնվող էներգիայի սեփական մեծ պաշարներ, որոնց օգտագործումը թույլ կտա ապագայում բավարարել հանրապետության էլեկտրաէներգիայի պահանջարկի մինչև 30 տոկոսը։ Այս մասին այսօր լրագրողների հետ հանդիպման ժամանակ ասաց էներգետիկայի և էներգախնայողության հիմնադրամի տնօրեն Թամարա Բաբայանը։
Նույն հիմնադրամի վերականգնվող էներգետիկայի ծրագրի ղեկավար Արայիկ Մարջանյանը նշեց, որ Հայաստանում այսօր բազմաթիվ ծրագրեր ու ուսումնասիրություններ են կատարվում, որոնք հիմնավորում են հանրապետությունում տնտեսապես իրատեսական և ֆինանսապես շահավետ վերականգնվող էներգիայի պոտենցիալը։
«2010 թ. արդեն վերականգնվող էներգիայի աղբյուրների հիման վրա Հայաստանում արտադրվել է մոտ 310 ԳՎտ-ժամ էներգիա, 2015-ին այս ցուցանիշը կարող է կազմել մոտ 740 ԳՎտ-ժամ և 2020-ին հասնել մինչև 1500 ԳՎտ-ժամ մակարդակի»,- նշեց Ա. Մարջանյանը։
