Այսօր բողոքի ակցիաներ են իրականացրել Մշակույթի և Սփյուռքի նախարարությունների աշխատակիցները՝ դժգոհություն արտահայտելով և պահանջելով վերանայել ընդդեմ կառավարության օպտիմալացման ծրագիրը, որի իրականացմամբ գործող 17 նախարարությունների թիվն առաջիկայում կհասնի 12-ի։ Նախատեսվում է Սփյուռքի նախարարությունը լուծարել և Մշակույթի, Սպորտի և երիտասարդության նախարարությունները միավորել Կրթության և գիտության նախարարության հետ։
Ակնհայտ է, որ գործ ունենք ցավոտ որոշման հետ: Թեմայի շուրջ «Առաջին լրատվական»- ի հետ զրույցում իրենց դիտարկումները ներկայացրին քաղաքագետներ Ստյոպա Սաֆարյանը և Հայկ Սահակյանը, «Իմ քայլը» դաշինքից ընտրված պատգամավոր Գայանե Աբրահամյանը:
Ս. Սաֆարյանի խոսքով՝ համակարգի օպտիմալացումն անհրաժեշտություն էր, և դա նոր հրամայական չէ, նախկին իշխանությունների օրոք ամեն ընտրություններից հետո ուռճացնում էին համակարգը՝ ընտրությունների ժամանակ ծառայություն մատուցած անձանց աշխատանքի տեղավորելով: «Համակարգն անբնական ուռճացվել էր վերևից՝ պետական կառավարման մարմիններից մինչև ներքև՝ տեղական ինքնակառավարաման մարմիններ: Այս խնդիրը պետք է լուծում ստանար… Բայց չի խոսվում գործառույթների մասին: Այստեղ ուրիշ խնդիր կա. արդյո՞ք ՀՀ-ն չունի մշակութային քաղաքականության գործառույթի անհրաժեշտություն: Հայտնի չէ՝ ինչ են ուզում իրականացնել: Կառավարությունը պետք է կոնցեպցիա հրապարակի»,- նշեց քաղաքագետը:
Հայկ Սահակյանը, խնդիրը դիտարկելով սոցիալական բաղադրիչի դիտանկյունից, նշեց, որ իսկապես բյուրոկրատական ահռելի համակարգ էր ստեղծվել ինչ- ինչ հարցեր լուծելու համար, բայց գրչի մի հարվածով օպտիմալացումը մեկ այլ ծայրահեղության մեջ է գցելու: Նրա խոսքով՝ առանց որևէ այլընտրանք առաջարկելու մարդկանց աշխատանքից զրկելը խնդիրներ է առաջացնելու:
Գ. Աբրահամյանի խոսքով՝ պետբյուջեից աշխատավարձ ստացող մարդկանց թիվը չափազանց շատ է: Նրա հավաստմամբ՝ կա հստակ ծրագիր, որ օպտիմալացման արդյունքում մարդիկ գործազուրկ չդառնան: Պատգամավորի կարծիքով՝ նախարարությունների միավորման արդյունքում շատ հարցերում հնարավոր է շահել, հնարավոր է և հակառակ արդյունք լինի:
Մանրամասն՝ տեսանյութում:
