Անցած շաբաթվա վերջին գրանցվեց հետընտրական շրջանի մի իրադարձություն, որը կարծես դուրս մնաց հիմնական լրահոսից։ ՕԵԿ ղեկավար Արթուր Բաղդասարյանը կուսակցության համագումարում հայտարարել է ակտիվ քաղաքականությունից հեռանալու մասին: Համագումարը ՕԵԿ նախագահի պաշտոնում առաջադրել և միաձայն քվեարկությամբ ընտրել է Հովհաննես Հովհաննիսյանին: ՕԵԿ փոխնախագահներ են ընտրվել նոր դեմքեր։ Կուսակցական պաշտոնական հաղորդագրությունից դատելով՝ ակտիվ քաղաքականությունից հեռացել է ոչ միայն Արթուր Բաղդասարյանը. համենայն դեպս՝ նորընտիր փոխնախագահների շարքում նշված չեն Մհեր Շահգելդյանի ու Հեղինե Բիշարյանի անունները, ովքեր կուսակցության հիմնադրման առաջին օրերից եղել են Բաղդասարյանի ակտիվ թիմակիցները։ Ի՞նչ արժեք ունի ՕԵԿ-ի այս քայլը հետընտրական զարգացումների համատեքստում: Թեմայի շուրջ «Առաջին լրատվական»- ի հետ քննարկմանը մասնակցեցին քաղտեխնոլոգ Կարեն Քոչարյանը, քաղաքագետներ Էդգար Վարդանյանը և Սուրեն Պետրոսյանը:
Կարեն Քոչարյանի դիտարկմամբ՝ Արթուր Բաղադասարյանն արել է քայլ, որը հայաստանյան ընդհանուր քաղաքական դաշտը մոտեցնում է համաշխարհային ընդունված ստանդարտներին. «Պարտված ուժի ղեկավարը հեռանում է՝ իր տեղը զիջելով այլ լիդերի. սա ընդունված նորմ է ամբողջ աշխարհում, որը Հայաստանում երբեք չի կիրառվել: Կարծում եմ՝ այս օրինակին պետք է հետևեն և՛ ՀՀԿ-ն, և՛ ՀՅԴ-ն»:
«Չորրորդ իշխանությունը՝ ԶԼՄ-ները, մեծ ներդրում պետք է ունենան քաղաքական արդիականացման գործում, որովհետև նրանք հանրային կարծիքի ձևավորման գործում գլխավոր դերակատարն են: Կարելի է ասել, որ սկիզբը խոստումնալից է: Քաղաքական գործընթացի արդիականացման համար առաջին հերթին պահանջվում է, որ քաղաքական դերակատարի վարքն արդիականացվի, որը կբերի նոր քաղաքական մշակույթ: Արդյո՞ք Բաղդասարյանի քայլը արդյունավետ է և կենսունակություն հաղորդող իր կուսակցության և քաղաքական դաշտի համար, պարզ կլինի կարճ ժամանակ հետո»,- նշեց Սուրեն Պետրոսյանը:
Է. Առաքելյանի դիտարկմամբ՝ օրինաչափորեն հինը պետք է զիջի նորին, բայց նորը միշտ չէ, որ դրական է լինում և հինը՝ բացասական: «Միանշանակ է, որ խաղի կանոնները փոխվել են, և հին խաղի կանոնները տեղ չպետք է ունենան նոր Հայաստանում,- ընդգծեց քաղաքագետը: – ՕԵԿ-ի պահվածքը, կարծում եմ, ավելի շատ կապված է նրա հետ, որ ցանկանում են իրենց նկատմամբ ձևավորված բացասական կարծիքը մեղմել… ՕԵԿ-ը դիտարկվում է որպես հին քաղաքական համակարգի մի մաս, որն իրեն սխալ է դրսևորել, սատարել է ավտորիտար ռեժիմին… Եվ այս քայլով ՕԵԿ-ը փորձում է մաքրվել»:
Քննարկման մասնակիցների դիտարկմամբ՝ հետընտրական զարգացումները տարօրինակ են: «Տրամաբանություն չեմ տեսնում՝ ինչու են ԼՀԿ-ն և ԲՀԿ-ն մաշում իրենց վարկանիշը»,- նշեց Կ. Քոչարյանը՝ հավելելով, որ սա պայքար է ընդդիմության հարթակի համար, բայց անհասկանալի է, թե ինչու այդ ձևով: Ս. Պետրոսյանը հավելեց, որ քաղաքական մշակույթի մեջ դեռևս նոր հայեցակարգ չի բերվել, երբ որ պետք է ուղղորդվել քաղաքական երկխոսությամբ և ոչ թե էմոցիոնալ հարթակում միմյանց մերժելով ու վարկաբեկելով:
Մանրամասն՝ տեսանյութում:
