«ՀԺ»-ն գրում է. «Երեկ մեր թղթակցին նոր մանրամասներ են հայտնի դարձել խիստ իշխանամետ հայացքներով հայտնի ռուս հեռուստամեկնաբան Դմիտրի Կիսելյովի՝ Երեւանում հիմնադրած «Գրիբոյեդով» ակումբի վերաբերյալ։
Պարզվում է, «Գրիբոյեդով» ակումբի հավաքներից մեկին մասնակցել է նաեւ ՀՀ արտաքին գործերի նախարար Էդվարդ Նալբանդյանը։ Ինչով է սա ուշագրավ։
Նախորդ օրը ակումբի մասին մեզ որոշ մանրամասներ ներկայացնելով՝ այդ նույն ակումբի անդամ, քաղաքագետների միության նախագահ Հմայակ Հովհաննիսյանը կտրականապես հերքել էր մեր այն դիտարկումը, թե այդ ակումբը գործում է գաղտնի, կամ առնվազն կիսագաղտնի ռեժիմով։
Սակայն ՀՀ արտաքին գործերի նախարար Էդվարդ Նալբանդյանի մասնակցությունը «Գրիբոյեդով» ակումբի աշխատանքներին պահվել է գաղտնի։ Ի՞նչ ելույթ է ունեցել ՀՀ արտաքին գործերի նախարարը, ի՞նչ է ասել, ի՞նչ հարցերի է պատասխանել, ո՞ր թեման է հատկապես հետաքրքրել «գրիբոյեդովականներին», ինչո՞ւ են նրան հրավիրած եղել…
Սրանք զուտ սպորտային հետաքրքրություն ներկայացնող հարցեր չեն։ Խոսքը ՀՀ արտաքին գործերի նախարարի մասին է։ Անձ, ով ի պաշտոնե պետական գաղտնիք կրող է։ Ու վերջինս մասնակցում է մեղմ ասած մի անհասկանալի ակումբի աշխատանքների, մի քանի ժամ ինչ-որ բաներ է խոսում, հարցերի պատասխանում, կոնյակ ըմպում եւ այդ մասին ոչ մի տեղ բացարձակապես ոչ մի տեղեկատվություն չկա։
Երեկ մենք համացանցում վերջապես հայտնաբերեցինք «griboedoff.net» անվանումով կայքը, որն իբր ցույց է տալիս, որ այդ ակումբը գաղտնի չի գործում։ Կայքի անվանումը «ff» եւ«net» տառերով նշելը արդեն խոսում է այն մասին, որ փորձ է արվել մի կողմից առանձնապես հրապարակային չդարձնել կայքը, մյուս կողմից անհրաժեշտության դեպքում հայտարարել, թե իրենք հրապարակային են գործում։ Բայց նույնիսկ այդ պարագայում կայքում ակնարկ անգամ չկա, որ ակումբի աշխատանքներին մասնակցել է ՀՀ արտգործնախարարը»։
Մանրամասները` թերթի այսօրվա համարում
