Ռուսաստանի Պետդումայի պատգամավոր Կոնստանտին Զատուլինն անդրադարձել է Ռոբերտ Քոչարյանի կալանավորման փաստին։ «Ես, անկասկած, չեմ միջամտում ո՛չ նախընտրական պայքարին, ո՛չ էլ ներքին գործերին, ավելին, որքանով տեղյակ եմ, ինքը՝ Ռոբերտ Քոչարյանն էլ ոչ մի կերպ չի մասնակցել և չի մասնակցում նախընտրական քարոզչությանը, սակայն ես Հայաստանի համար խայտառակություն եմ համարում այն, որ այս տարվա գարնանը եկած իշխանությունը հաշիվներ է մաքրում և վրեժխնդիր լինում մի մարդուց, որը մեծ արժանիքներ ունի և՛ Լեռնային Ղարաբաղի, և՛ Հայաստանի առջև»,- ասել է Պուտինի թիմակիցներից մեկը։
Եթե ուշադրություն դարձրեցիք, Զատուլինն ակնարկում է, թե Քոչարյանն ընտրական մրցակից չէր ու չարժեր նրա հետ նման կերպ վարվել։ Ռուսաստանում, նույնիսկ իշխանության մակարդակով, չեն մարսել այն իրողությունը, որ հետհեղափոխական Հայաստանում մարդկանց քրեական հետապնդման են ենթարկում ոչ թե քաղաքական, այլ բացառապես իրավական պատճառներով։
Կոնստանտին Զատուլինը խոսում է Քոչարյանի անձեռնմխելիության մասին՝ ակնհայտորեն մոռանալով, որ Հայաստանի վճռաբեկ դատարանը, ըստ էության, անհիմն է համարել երկրորդ նախագահին ազատության մեջ թողնելու այդ մոտիվը։ Քոչարյանի մեղադրանքի էությունն այնքան ակնհայտ է, որ նա կոնկրետ դուրս գալով իր սահմանադրական լիազորությունների շրջանակներից, զինված ուժերը ներքաշել է ներքաղաքական գործընթացների մեջ և, ըստ էության, տապալել է երկրի սահմանադրական կարգը։ Ըստ այդմ՝ այստեղ խոսք անգամ չի կարող գնալ նախագահական իմունիտետի մասին։
Զատուլինը կարծում է, որ Քոչարյանի կալանավորումը նվաստացնում է Հայաստանին և, անկասկած, միջազգային առումով հավելյալ հեղինակություն չի ստեղծում։ Իհարկե, շատ լավ կլիներ, որ Պետդումայի պատգամավորը սահմաներ, թե ինչ է հասկանում «միջազգային հեղինակություն» ասելով, որովհետև Քոչարյանի կալանավորման պատճառով Հայաստանի իշխանությունները պրոբլեմներ կարող են ունենալ միայն մոսկովյան շրջանակների հետ՝ հաշվի առնելով Հայաստանի երկրորդ նախագահի ու Ռուսաստանի առաջնորդ Վլադիմիր Պուտինի մտերմությունը։ Մյուս կողմից՝ չենք կարծում, որ Պուտինը գնա երկկողմ հարաբերությունների վատթարացման Քոչարյանի պատճառով։ Ավելի շատ հակված ենք մտածել, որ Մոսկվայում կբավարարվեն մի քանի արարողակարգային հայտարարություններով՝ փորձելով ճնշում գործադրել Երևանի նկատմամբ։
««Վհուկների որսը» և «ժողովրդի թշնամիների» նկատմամբ հետապնդումները բավական մեծ վնասներ են պատճառել իմ երկրին՝ Խորհրդային միությանը, և մինչև այժմ դրանք սերունդների հիշողության մեջ դրոշմված են որպես պատմության մութ էջ։ Չէի ցանկանա, որ Հայաստանը, որը 1991 թվականին իր պետականության նոր էջը բացեց, անցնի այն ամենի միջով, ինչով անցել են բոլորը 30-ական թվականներին»,- իր հարցազրույցի վերջում ասել է Զատուլինը։
Պետդումայի պատգամավորի համեմատությունը, մեղմ ասած, համարժեք չէ, որովհետև անցյալի ծանր հանցագործությունները բացահայտելով՝ Հայաստանը, ճիշտ հակառակը՝ իրեն ձերբազատում է նոր ավտորիտար համակարգ հանդուրժելու վտանգից։
Առհասարակ՝ այն, ինչ ռուսների համար խայտառակություն է, Հայաստանի համար՝ արժանապատվության վերականգնում է։ Ու շատ լավ կլիներ, որ Մոսկվայում հնարավորինս արագ հասկանային այս ճշմարտությունը։
