«Baby It’s Cold Outside» ստեղծագործությունը դասական Սուրբ Ծննդյան երգ է, որը ձմռանը կարելի է լսել աշխարհի տարբեր ռադիոկայաններով: Սակայն, ամերիկյան ռադիոկայանը այն հանել է եթերից՝ սեռական ոտնձգությունների ակնարկների մասին ունկնդիրների բողոքներից հետո: Այս մասին հաղորդում է ВВС Ուկրաինան:
Ամերիկյան լրատվամիջոցները հաղորդել են, որ որոշ ունկնդիրներ երգի բովանդակությունն անընդունելի են համարել՝ հաշվի առնելով սեռական ոտնձգության դեմ պայքարի խորհրդանիշ դարձած #MeToo շարժման կողմից առաջ քաշված խնդիրները:
Ֆրենկ Լեսերի 1944թ.-ին գրած երգը տարբեր ժամանակներում հնչել է Լեդի Գագայի, Մայքլ Բուբլեի, դերասաններ Ուիլ Ֆերելի և Զոուի Դեշանելի կատարմամբ:
1949թ.-ին «Baby It’s Cold Outside»-ը արժանացել է Օսկարի:
«Baby It Cold Outside»-ը, որպես կանոն, կատարվում է դուետով՝ տղամարդ և կին: Ըստ երգի բովանդակության կինը, որը հյուրընկալվում է տղամարդու տանը, պատրաստվում է գնալ, իսկ տղամարդը, չնայած կրկնվող մերժումներին, շարունակում է համոզել նրան գիշերը միասին անցկացնել:
Երգի հերոսուհին ասում է «ոչ», իսկ նրան պատասխանում են «այսինքն, այո, ճի՞շտ է»: 2018 թ.-ին բոլորս գիտենք, որ համաձայնությունը «այո» պատասխանն է, իսկ եթե ձեզ ասում են «ոչ»՝ պետք է կանգ առնել, բացատրում է Քլիվլենդի կենտրոնի նախագահ Սոնդրա Միլերը, որն օգնում է բռնաբարության զոհերին:
The Star 102-ի վարողը գրել է, որ «Baby It’s Cold Outside» երգը գրվել է բոլորովին այլ ժամանակաշրջանում, և այսօր նրա խոսքերը կարող են մի փոքր այլ կերպ ընկալվել:
