Խորհրդարանի արտահերթ ընտրության գործընթացին զարմանալիորեն ուղեկցում է նոր արտահերթ ընտրության վերաբերյալ խոսակցությունը, որ հնչում է տարբեր աղբյուրներից: Ինչո՞ւ է այդ հանգամանքը զարմանալի: Այն պատճառով, որ հասարակությունը դեռ մի արտահերթ ընտրությունը չկատարած՝ տարբեր ուժեր և անհատներ նրա հետ խոսում են արդեն դրանից հետո ևս մեկ անխուսափելի արտահերթի մասին: Իսկ այդ հանգամանքը ունի հանրային միտքը խճճելու բավականին ազդեցիկ հատկություն, որովհետև եթե մեկ-երկու տարի անց կարող է լինել նոր արտահերթ ընտրություն, ապա ընտրողը սկսում է իրավիճակը չափել արդեն հենց այդ հեռանկարով և ըստ այդմ հայտնվում է չափման ճշգրտության և խնդիրների նենգափոխվածության լուրջ մարտահրավերի առաջ: Ի՞նչ են մտածում այդ մասին ընտրության մասնակիցները․ «Առաջին լրատվական»- ի հետ քննարկմանը մասնակցեցին Էլեն Հոխիկյանը՝ «Քաղաքացու որոշում» սոցիալ-դեմոկրատական կուսակցությունից, Րաֆֆի Գևորգյանը՝ «Լուսավոր Հայաստան» կուսակցությունից և Սոս Ավետիսյանը՝ «Ելք» դաշինքից:
«Չկարողացանք հասնել նրան, որ նոր ԸՕ-ն կյանքի կոչվեր: Կա կարծիք, որ ընտրությունները տեղի կունենան նախորդ ընտրությունների տրամաբանությամբ: Եթե ԸՕ-ն փոխվոր, որոշ ուժեր, այդ թվում նաև ՀՀԿ-ն և ՀՅԴ-ն, չէին մասնակցի ընտրություններին: Գործող ԸՕ-ն հնարավորություն ընձեռեց հայտ ներկայացնելու ընտրություններին և ապագա խորհրդարանի մասը լինելու»,- նշեց Է. Հոխիկյանը:
Անդրադառնալով դիտարկմանը, որ շրջանառվում է անցումային խորհրդարան արտահայտությունը, և հարց է առաջանում, թե դա ում է ձեռնտու, Ր. Գևորգյանը նշեց, որ միգուցե այս արտահերթ խորհրդարանական ընտրությունները հիմք հանդիսանան, որ երկու տարի հետո նորից արտահերթ խորհրդարանական ընտրություններ լինեն. «Ես դա բացասական չեմ համարում: Ընտրական պրոցեսները խճճում են հասարակությանը: Ամեն դեպքում ներկայումս խորհրդարանական ընտրություններն անհրաժեշտ են»:
Ս. Ավետիսյանը հավելեց, որ անցումային խորհրդարան հասկացության շրջանառությունը քաղտեխնոլոգիա է, որի մեխն այն է, որ այս խորհրդարանն էլ հավերժ չէ. «Եվ դա որոշակի առումով նորմալ է ժողովրդավարական տեսլական ունեցողների համար, բայց անցողիկ լինելու մասին միտքը շեշտվում է, որպեսզի թույլ չտրվի ստեղծված իրավիճակի ինստիտուցիոնալ զարգացում»:
Ս. Ավետիսյանը նաև ընդգծեց, որ նախկին ռեժիմը ջախջախված է, և Ս. Սարգսյանի կուսակցությունն ինչքան ուզում է մասնակցի ընտրություններին, անկարևոր է:
Քննարկման մասնակիցների դիտարկմամբ՝ այս ընտրություններին գաղափարական վեճ չի լինելու. կռիվը նաև հին և նոր համակարգերի միջև է:
Մանրամասն՝ տեսանյութում:
