2014թ. հունվարի 1-ից ՌԴ-ում ուժի մեջ մտած «ՌԴ-ից ելքի և ՌԴ մուտքի մասին» և «ՌԴ-ում օտարերկրյա քաղաքացիների իրավական կարգավիճակի մասին» դաշնային օրենքներում կատարված փոփոխությունների մասին այսօր լրագրողների հետ հանդիպման ընթացքում խոսեց փաստաբան Լիլիթ Ներսիսյանը:
Նա նշեց, որ 2014թ. հունվարի 1-ից սկսած ՌԴ առանց վիզա մուտքի իրավունք ունեցող պետությունների (այդ թվում՝ Հայաստանի Հանրապետության) քաղաքացիները կարող են ՌԴ տարածքում մնալ 90 օր յուրաքանչյուր 180 օրվա ընթացքում. կարգը խախտողների համար սահմանվել է ՌԴ մուտք գործելու արգելք 3 տարի ժամկետով:
Նրա խոսքերով՝ այս օրենքը տարածվում է Ռուսաստանի հետ վիզային ռեժիմ չունեցող բոլոր երկրների, այդ թվում՝ Մաքսային միության անդամ այն երկրների վրա, որոնք Ռուսաստանի հետ վիզային ռեժիմ չունեն:
Օրենքի փոփոխությունները, սակայն, ունեն բացառություններ. «Այն չի վերաբերում բարձր որակավորում ունեցող մարդկանց, այն մարդկանց, որոնք կնքել են աշխատանքային պայմանագիր, այսինքն՝ նրանք կարող են ՌԴ տարածքում գտնվել իննսունից ավել օր»:
Բացի այդ՝ փաստաբանը ընդգծեց, որ սա տարածվում է նաև ընտանիքի անդամների վրա:
Ներսիսյանի կարծիքով՝ սա արվում է այն բանի համար, որպեսզի նրանք, ովքեր մեկնում են արտագնա աշխատանքի, իրենց գործատուների հետ պայմանագրեր կնքեն:
Իրավաբանը հավելեց, որ մնացած բոլորը, այդ թվում՝ օտարերկրյա քաղաքացիները, որոնք կրթություն ստանալու նպատակով մեկնում են Ռուսաստան, երեք ամսից ավել մնալու դեպքում պետք է հետ վերադառնան, և երեք ամիս անց նորից կարող են ՌԴ գնալ:
Եթե աշխատանքային պայմանագիրը կնքված է ավելի քան մեկ տարի ժամկետով, ապա անձը մեկ տարի անց պետք է վերադառնա, հետո նորից մեկնի․ «Անձը կարող է մեկ տարի ժամկետով մնալ աշխատանքային պայմանագիր ունենալու դեպքում, եթե նույնիսկ պայմանագիրը մեկ տարուց ավել է, ապա միևնույն է՝ պետք է վերանայեն, նա հետ վերադառնա, երեք ամիս մնա դրսում, նորից գա:
Վերջում Լիլիթ Ներսիսյանն ասաց, որ օրենքը ընդունվել է դեկտեմբերի 28-ին, օրինական ուժի մեջ է մտել հունվարի 10-ից, այսինքն՝ այդ օրվանից է իննսուն օր հաշվարկվում:
