«Դեռևս խորհրդային տարիներից եկող մի խոսք կա, ասում են՝ հեղափոխությունը ունի սկիզբ, չունի վերջ, բայց եթե իշխանությունը գնա այդ տրամաբանությամբ, ապա աստիճանաբար կգնա դեպի պրավալ»,- «Առաջին լրատվական»-ի հետ զրույցում նման կարծիք հայտնեց քաղտեխնոլոգ Վիգեն Հակոբյանը՝ պատասխանելով հարցին, թե արդյոք այս արտահերթ ընտրություններով ու իշխանության ձևավորմամբ հեղափոխությունն ամբողջությամբ կավարտվի, թե հեղափոխական տրամաբանությունը կպահպանվի նաև հետընտրական Հայաստանում։
Հակոբյանի խոսքերով՝ հնարավոր չէ հասարակությանը պարբերաբար պահել հեղափոխական տրամադրությունների մեջ, հնարավոր չէ հասարակությանը միշտ պահել էյֆորիայի մեջ, քանի որ այդ նույն հասարակությունը լուրջ ակնկալիքներ ունի, որ հայտարարություններից զատ, աշխատանք է արվելու, և արդյունքներ են գրանցվելու։ «Անընդհատ ապավինել նրան, որ հեղափոխությունը դեռ չի վերջացել, դեռ անելիք կա, դեռ տնտեսական հեղափոխություն պետք է տեղի ունենա, դրանից հետո մշակութային և այլ տեսակի հեղափոխություններ, ապա դա լուրջ չէ, և դրա համար անհրաժեշտ այդ մեծ ռեսուրսն էլ չկա։ Բայց ես կարծում եմ, որ ապագա իշխանությունը հաշվի կառնի, որ հեղափոխական ռեսուրսը, գործիքակազմն էլ լիմիտ ունի ու այս ընտրություններից հետո ու կառավարության ձևավորումից հետո հեղափոխական ոճը, հռետորաբանությունը վերջնականապես իր տեղը կզիջի ավելի կոնստրուկտիվ ոճի»,- նկատեց Հակոբյանը՝ հավելելով, որ դա իրատեսական կլինի, քանի որ ընտրություններից հետո իշխանությունն ամբողջությամբ կլինի Նիկոլ Փաշինյանի ձեռքը, որը հենց հեղափոխության տրամաբանությունն էր։ «Այս ընտրությունների ավարտն ու գրանցած արդյունքը իրավաբանորեն կամրագրի, կկապիտալիզացնի իշխանափոխության արդյունքները։ Դրանից հետո ժամանակավրեպ կլինի խոսել հեղափոխության շարունակվելու մասին։ Հակառակ պարագայում՝ անգամ իրենց անվերապահ աջակիցները կվերանայեն իրենց մոտեցումները»,- ասաց քաղաքագետը՝ հավելելով, որ նոյեմբերի 24-ի քայլերթը հստակ ցույց տվեց, որ եթե հանրությունը հստակ չի տեսնում նպատակ, վտանգ փողոց դուրս գալու համար, ինքը, կողմ մնալով հանդերձ, փողոց դուրս չի գալիս։
Վիգեն Հակոբյանի խոսքերով, սակայն, կարելի է ժամանակ առ ժամանակ օգտագործել հեղափոխական ոճը, եթե, իհարկե, կան դրա պատճառները, եթե, ասենք՝ կա արտաքին վտանգ, դրսի համար անհրաժեշտ լինի ուժի ցուցադրություն անել։ «Բայց ոչ մի պարագայում դա չպետք է լինի պերմանենտ»,- եզրափակեց մեր զրուցակիցը։
