Հայաստանի Հանրապետության և Ռուսաստանի Դաշնության համագործակցությունն ատոմային էներգետիկայի ոլորտում հայ-ռուսական հարաբերությունների բաղկացուցիչ մասն է, և ներկայումս հարց է բարձրացվում ստեղծելու աշխատանքային խումբ, որն ուսումնասիրելու է այս ոլորտում համագործակցության հեռանկարները Հայկական ատոմային էլեկտրակայանի շահագործման ավարտից հետո:
Այս մասին լրագրողների հետ զրույցում նշեց Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինը:
««Ռոսատոմ »-ում կան շատ հետաքրքիր և հեռանկարային նախագծեր այս մասով, որոնք կարող են հետաքրքրել Հայաստանին և որոնք կհամապատասխանեն երկրում էլեկտրաէներգիայի օգտագործման յուրահատկություններին»,- ասաց Կոպիրկինը:
ՌԴ դեսպանը նշեց, որ այս ոլորտում համագործակցությունը գտնվում է երկու երկրների ղեկավարների շատ խիստ վերահսկողության ներքո:
Խոսելով ՀԱԷԿ-ի մասին, ՌԴ դեսպանն ընդգծեց, որ այն ունի անգնահատելի ներդրում Հայաստանի սոցիալ-տնտեսական զարգացման գործում ` ապահովելով արդյունաբերական օբյեկտների աշխատանքը և այն մեծ դեր է կատարում, որպեսզի էլեկտրաէներգիայի սակագինը մարդկանց համար լինի ընդունելի:
«Այսօր իրականացվում է Հայկական ատոմային էլեկտրակայանի շահագործման երկարաձգման նախագիծը մինչև 2026 թվական: Ես չեմ բացառում, որ ինչ-որ փուլում հետագա երկարաձգման հարցը նորից օրակարգային դառնա, բայց դա պահանջում է ատոմային էլեկտրակայանի շատ լուրջ և մանրամասն փորձաքննություն`անվտանգության ապահովման առակայի մասով», -նշեց Կոպիրկինը:
ՌԴ դեսպանի կարծիքով` ատոմային էներգետիկայի ոլորտում երկու երկրների համագործակցությունը բավականին հեռանկարային է հայ-ռուսական հարաբերությունների շրջանակներում:
