Վերջին շրջանում հասարակության մեջ ավելացել է քննադատությունը կառավարության նկատմամբ․ կադրային քաղաքականության համար, այն պատճառով, որ նոր Ընտրական օրենսգրքի համար մինչև վերջ չպայքարեց, վերջացրած «խոպանչիներին» հարկելու թեմայով։ Սա նշանակում է, որ հեղափոխությունը մտել է ճգնաժամային փո՞ւլ «Առաջին լրատվական»-ի հարցին Գյումրու ավագանու անդամ Լևոն Բարսեղյանը պատասխանեց․ «Ընդհակառակը, սա շատ լավ նշան է։ Մարդիկ, ովքեր երկար ժամանակ լռում էին, վախենում էին արտահայտվել, հիմա ազատորեն արտահայտվում են։ Այդպես էլ պիտի լինի, ոչ մի ճգնաժամ չեմ նկատում։ Ինձ թվում է, որ անհանգստանալու մեծ պատճառներ մենք չունենք, և արտահայտվելու մղումները շատ տարբեր են։ Ենթադրում եմ, որ մեծամասամբ բարեխիղճ մտահոգություններ են։ Որոշ դեպքերում մարդ կա, որ տեղեկություն չունի և արտահայտվում է ըստ այդմ, իսկ որոշ դեպքերում էլ արտահայտվելը պատվերով է։ Մեծամասամբ շատ լավ է՝ այդ բազմակարծությունը ինձ դուր է գալիս։ Իսկ մտահոգվելու բաներ միշտ էլ ունենք։ Կարծում եմ, որ այդ մտահոգությունները բարձրաձայնելն ու իշխանություններին հասցնելը յուրաքանչյուր բարեխիղճ քաղաքացու գործն է»։
«Իշխանությունը օրենսդրական ինչ-ինչ նախագծեր առաջ քաշելիս պետք է հանրության կարծիքն իմանա և առաջնորդվի հանրային կամքով, միաժամանակ, այդ հանրային կամքը միաձույլ, միատեսակ չպետք է լինի․ պետք է լինեն տարբեր կարծիքներ։ Դա արդյունավետ ալգորիթմ է»,- հավելեց Լևոն Բարսեղյանը։
Ամբողջությամբ՝ տեսանյութում։
