«Ամերիկայի Ձայն»-ի փոխանցմամբ՝ իրավապաշտպան «Freedom House» կազմակերպության համաձայն, անցյալ տարվա ընթացքում ազատությունն աշխարհում նվազել է, և աշխարհի բնակչության կեսից ավելի ապրում է այնպիսի վայրերում, որոնք մասամբ են ազատ կամ ընդհանրապես ազատ չեն:
ԱՄՆ-ի մայրաքաղաք Վաշինգտոնից իր գործունեությունն իրականացնող կազմակերպությունը հինգշաբթի հրապարակած իր զեկույցում գնահատել է ազատության հետ կապված իրավիճակը 195 երկրում և 14 «տարածքներում»՝ հիմք ընդունելով քաղաքական իրավունքներն ու քաղաքացիական ազատությունները:
Սիրիայում շարունակվող բռնությունների ու բախումների և Սաուդյան Արաբիայում տեղ գտած ճնշումների պատճառով այս պետությունները ներառվել են աշխարհի ոչ ազատ երկրների ցանկում:
Մերձավոր Արևելքում ընդհանուր առմամբ բնակչության 83 տոկոսն ապրում է «ոչ ազատ» պետություններում:
Զեկույցի հեղինակ Արչ Փադինգթընի համաձայն, ազատությունները սահմանափակելու համար կառավարությունները, բացի բռնություններից, օգտագործում են նաև այլ միջոցներ:
«Քաղաքական էլիտաները միշտ չէ, որ բռնությունների են դիմում: Նրանց պետք չէ մարդկանց կանգնեցնել պատին, սակայն նրանք, այնուամենայնիվ, կարողանում են վերահսկել քաղաքականությունը և սահմանափակել քաղաքական ընդդիմությունը», – նշել է զեկույցի հեղինակը:
Եվրասիայի տարածաշրջանը նույնպես գնահատվել է որպես տարածաշրջան, որտեղ խարխլվում է ազատության հետ կապված վիճակը: Այս տարածաշրջանում բնակչության երեք չորրորդն է ապրում «ոչ ազատ» գնահատված պետություններում:
Զեկույցում հիշատակվել է Ռուսաստանում փոքրամասնությունների, այդ թվում՝ համասեռականների, հետապնդումը, ինչպես նաև Ուկրաինայում մամուլի ազատության դեմ ուղղված պայքարը:
«Ազատությունն աշխարհում 2014» զեկույցում նշված է, որ 2013 թվականի ընթացքում Չինաստանում նվազել է հանդուրժողականությունը՝ խոսքի առցանց ազատության սահմանափակման և ակտիվիստների բանտարկությունների պատճառով:
«Այժմ ապրում ենք այնպիսի ժամանակում, երբ ավտորիտար առաջնորդները դառնում են է՛լ ավելի ինքնավստահ և լկտի, քան նրանք եղել են անցյալում, և ստեղծվել են ճնշումներ գործադրող պետությունների պաշտոնապես չամրագրված դաշինքներ», – նշում է «Ազատությունն աշխարհում 2014» զեկույցի հեղինակը:
«Freedom House» իրավապաշտպան կազմակերպության համաձայն, 2013 թվականը դարձել է ութերորդ անընդմեջ տարին, երբ աշխարհում ազատության ընդհանուր մակարդակն անկում է ապրել:
