«Սա կազմակերպված գրոհ է, հետադիմություն, փորձ՝ անցյալին վերադառնալու»,- այս մասին «Առաջին լրատվական»- ի հետ զրույցում ասաց քաղաքագետ, Քրիստոնյա – ժողովրդական կուսակցության նախընտրական ցուցակը գլխավորող Լևոն Շիրինյանը՝ անդրադառնալով ԱԺ-ում այսօր նոր Ընտրական օրենսգրքի տապալմանը: «Վերջին շրջանում կարծես շախմատ են խաղում. քարերը տեղափոխում են կանոնավոր, նախաձեռնություն են վերցնում, և դա արտացոլվեց այսօրվա քվեարկության մեջ»,- նշեց քաղաքագետը՝ հավելելով, որ այս քվեարկությունը լեգիտիմ չէ, այլ դավադիր ձևով կազմակերպված. քաղաքական պարզունակ, բայց հաջողված տեխնոլոգիաներ են կիրառվել:
Շիրինյանի դիտարկմամբ՝ այս գործընթացը, որը ժողովրդի սուվերեն կամքին դեմ է, կարող է երկիրը տանել ճահճացման, և սա արդյունք է կառավարության անհետևողակնության ու իրադրության գնահատականների մեջ վրիպումների:
«Սա կազմակերպված հակահեղափոխություն է, շտապ քայլեր են պետք,- նշեց Շիրինյանը:- ՔՊ-ն պետք է կազմակերպի առաջիկա ընտրությունների բոյկոտը, եթե այդպես չարվի, լեգիտիմացվում է նախկին ռեժիմը»:
Քաղաքագետի դիտարկմամբ՝ ժողովուրդը սուվերեն է, պետք է շրջափակեր ԱԺ-ն, եթե ժողովուրդը հավաքված լիներ, ԱԺ պատգամավորներից շատերն այլ կերպ կքվեարկեին:
«Այս Ընտրական օրենսգրքով ընտրությունների չի կարելի գնալ, սա օլիգարխիայի վերարտադրություն է»,- ընդգծեց Լ. Շիրինյանը:
Մանրամասն՝ տեսանյութում:
