Ազգային ժողովում քիչ առաջ տապալվեց Ընտրական օրենսգրքում փոփոխությունների նախագծի քվեարկությունը: Ավելի շուտ, քվեարկությունը կայացավ, սակայն կողմ ձայները բավարար չէին: Այդպիսով, ՀՀԿ-ն, ըստ էության, հաստատեց, թե ինչու է պետք շուտափույթ խորհրդարանի ընտրություն: Ակնհայտ դարձավ, որ անհրաժեշտության դեպքում այդ ուժը կարող է տապալել կարևոր օրենսդրական նախաձեռնություններ, որոնք պահանջում են պարզ մեծամասնությունից ավելի: ՀՀԿ-ն այսօր սաբոտաժով լավագույնս ապացուցեց խորհրդարանի ընտրությունն արագացնելու անհրաժեշտությունը: Միևնույն ժամանակ, այդ ընտրությունը պետք է անցնի հին օրենսգրքով, որի ամենախնդրահարույց դրույթ է դիտարկվում, այսպես կոչված, ռեյտինգային ընտրակարգը, որը ՀՀԿ-ն հատուկ ներդրել էր 2017 թվականի խորհրդարանի անաղմուկ ընտրություն անցկացնելու և, ըստ էության, փողով ձայն քերելու համար:
Արձանագրենք, որ ՀՀԿ-ն այդպիսով, թերևս, կորցրեց նաև խանգարելու վերջին հնարավորությունը, քանի որ տասն օր անց, ըստ ամենայնի, խորհրդարանը կլուծարվի վարչապետի հրաժարականի արդեն գործողության մեջ մտած մեխանիզմով: Իհարկե, այստեղ կարող է առաջանալ հարցը հայտնի ռիսկի հետ կապված, ինչի վերաբերյալ, սակայն, Նիկոլ Փաշինյանը արեց զգուշացում, որ այդ դեպքում պարզապես ժողովուրդը դարձյալ պետք է հավաքվի իր օրակարգը հաստատելու: Իսկ հոկտեմբերի 2-ի փորձից ելնելով, ՀՀԿ-ի համար, թերևս, ավելի լավ է, որ 22-ին տեղի ունեցածը լինի հենց վերջինը նաև խանգարելու հնարավորության տեսանկյունից:
Թեմայի շուրջ «Առաջին լրատվական»- ի հետ քննարկմանը մասնակցեցին քաղաքական և ընտրական տեխնոլոգիաների մասնագետ Արմեն Բադալյանը «Գելափ ինթերնեյշնլ կազմակերպության» հայաստանյան ներկայացուցչության տնօրեն Արման Նավասարդյանը և քաղաքագետ Արմեն Բաղադասարյանը:
«ԸՕ նախագծի քվերակության արդյունքը վերջնական չենք կարող համարել, դեռևս հնարավոր է բանակցությունների արդյունքում ՀՀԿ-ն կողմ քվեարկի նախագծին,- նշեց Ա. Բադալյանը: -Եթե դա տեղի չունենա, և ընտրությունների գնանք գործող ԸՕ-ով, դա վատագույն տարբերակը չէ՝ անգամ վարկանշային ընտրակարգը»: Բադալյանի կարծիքով՝ վարկանշային ընտրակարգի դեպքում հանրապետականը միանշանակ տուժելու է:
Ա. Բաղդասարյանը կարծիք հայտնեց, որ եթե միայն համամասնական ընտրակարգով ընտրություններ լինեին, ՀՀԿ-ն ընդհանրապես շանս չէր ունենա, իսկ ռեյտինգային ընտրակարգով հույս ունի որոշակի ձայներ ստանալ. «Բայց սխալվում են. ՀՀԿ-ն շանս չունի հայատնվելու խորհրդարանում»,- նշեց քաղաքագետը: Նա նաև ընդգծեց, որ ՀՀԿ-ն, ընդդեմ պետական շահի, գնաց իր կուսակցական շահերը պաշտպանելու ճանապարհով:
Ա. Նավասարդյանի կարծիքով՝ նոր Ընտրական օրենսգիրքը ՀՀԿ-ին ավելի շատ հնարավորություն է ընձեռում, քանի որ նոր ԸՕ-ով անցումային նվազագայուն շեմը սահմանված է 2 տոկոս, և հավանական է, որ ՀՀԿ-ն այդ շեմը հաղթահարի:
Անդրադառնալով վերջին շրջանի պաշտոնյաների նշանակմանը և Նիկոլ Փաշինյանի հայտարարությանը՝ բարիկադները քանդելու փուլ թևակոխելու վերաբերյալ, Ա. Բաղդասարյանն ընդգծեց, որ հասարակության մեջ բարիկադներ չեն եղել. «Բարիկադների փոխարեն մեզ մոտ եղել են փշալարեր, որոնց մի կողմում եղել է ժողովուրդը, մյուս կողմում՝ իրավապահները:
Ցանկացած իշխանություն ունենում է կադրային սով և օգտվում է նախորդ իշխանությունների պրոֆեսիոնալ կադրերից, բայց պետք է լինի կարմիր գիծ, որից այն կողմ չի կարելի անցնել»:
Մանրամասն՝ տեսանյութում:
