Toyota ընկերությունը ներկայացրել է իր վերջին մշակումը` FT-1 սուպերավտոմեքենան, որը վիրտուալ թեստավորում է անցել Sony-ի Grand Tourismo համակարգչային խաղում: Այս մասին գրում է Mail Online-ը:
«Մենք համագործակցել ենք Grand Tourismo թիմի հետ` FT-1 վիրտուալ մոդելը մշակելու համար: Խաղը մենք օգտագործել ենք շնորհանդեսի համար, երբ նորույթը ներկայացնում էինք ընկերության տնօրեն Ակիո Տոյոդային:
Այսպես ասած, կենդանի մոդելի հետ ծանոթանալուց առաջ նա նախ GT6 տեսախաղում վարել է FT-1-ը: Տոյոդան գոհ է մնացել վիրտուալ թեստից, քանի որ նոր ավտոմեքենայով նա մեկ շրջանն ավելի արագ է անցել, քան նախկինում»,- ասել է ավտոմեքենայի արտաքին տեսքի համար պատասխանատու դիզայն-ստուդիայի ղեկավար Ալեքս Շենը:
Ավտոմեքենայի սրահն ինչ-որ բանով ռեակտիվ կործանիչի խցիկ է հիշեցնում: Հաղորդիչներն այնպես են տեղադրված, որ վարորդը կարողանա հետևել դրանց, սակայն չշեղվի ճանապարհից: Թափքին այն ունի ապակե պատուհան, որը թույլ է տալիս տեսնել ավտոմեքենայի շարժիչը:
