Թալինի Մելանթոն Արսլանյանի անվան թիվ մեկ դպրոցում մինչև 2003 թվականը վերանորոգման աշխատանքներ չեն իրականացվել: Ուսուցիչները պատմում են, որ անգամ պատերն էին քանդվում, և ծակ պատերը փակելու համար ստիպված քարտեզներ էին ամրացնում: 2003-ից դպրոցում մեկնարկում են վերանորոգման աշատանքները, լիբանանահայ բարերար Ռաֆֆի Արսլանյանի միջոցներով ամեն տարի դպրոցի մի խնդիր է լուծվում: Նորերով են փոխարինվել դրպոցի հնամաշ, փայտյա և կոտրված պատուհանները:
Նորոգվել են միջանցքները, դասասենյակները, սանհայգույցները, մուտքը և դպրոցը ամբողջությամբ հարմարեցվել է տեղաշարժման դժվարություններ ունեցող երեխաների համար: Ամբողջությամբ թարմացվել է դպրոցի ջրամատակարարման և ջրահեռացման համակարգը: Բարերարի միջոցներով անցկացվել է դպրոցի կենտրոնացված ջեռուցման համակարգը: Վերանորոգվել և համալրվել են բացօթյա և փակ սպորտդահլիճները, ճաշարանը: Դպրոցը ամբողջությամբ համալրվել է գույքով` գրատախտակներով, սեղան նստարաններով, պահարաններով: Հարակից այգին, որը անխնամ էր, նախկինում փակ էր աշակերտների համար, իսկ այժմ այնտեղի պտղատու ծառների առաջին բերքը հենց աշակերտներն են հավաքում: Այգում կառուցվել է հուշարձան` Հայրենական պատերազմի զոհերի հիշատակին:
Որքան գումար է ծախսվել` բարերարի ներկայացուցիչները չեն հաշվել, միայն մի բան են հստակ ասում. աշխատանքներ շարունակվելու են: Դեռ մասնակի փոխված մանրահատակը պիտի ամբողջությամբ թարմացվի: Բարերարի բարի գործը նաև մայրաքաղաք է հասել: Շիրվանզադեի անունը կրող դպրոցի հրակից պարիսպը ևս Ռաֆֆի Արսլանյանի նախաձեռնությամբ է կառուցվել: Դպրոցը ճանապարհին շատ մոտ է, իսկ պարիսպը անվտանգության համար ուղղակի անհրաժեշտություն:
