Հայաստանի համար շատ մեծ նշանակություն ունի Սիրիայում տիրող իրավիճակը ոչ միայն այն առումով, որ հարցը վերաբերում է տարածաշրջանային խաղաղությանն ու կայունությանը, այլև այն առումով, որ մենք ընդգծված անհանգստություն ունենք մեր հայրենակիցների անվտանգության հարցում: Այս մասին ՀՀ արտգործնախարարությունում հրավիրված մամուլի ասուլիսի ժամանակ ասաց ՀՀ արտգործնախարար Զոհրաբ Մնացականյանը:
Նրա խոսքով` Հայաստանն այս տարիների ընթացքում՝ 2011 թվականից ի վեր, հյուրընկալել է մեր հայրենակիցներին, Հալեպում գործող գլխավոր հյուպատոսությունն էլ առօրյա ռեժիմով աշխատում է և փորձում է հնարավոր ներդրումն անել մեր հայրենակիցների անվտանգութանը վերաբերող հարցերում: «Հայաստանն առաջին անգամը չէ, որ տրամադրել է հումանիտար օգնություն Սիրիայում ապրող մեր հայրենակիցներին: Իրենց անվտանգության հարցը շարունակում է մնալ մեր օրակարգային կարևորագույն հարցերից մեկը, և այդ տրամաբանությամբ է, որ մենք գործում և աշխատում ենք մեր գործընկերների հետ»,-ասաց Մնացականյանը՝ընդգծելով Ռուսաստանի Դաշնության դերը հումանիտար օգնությունն անվտանգ տեղ հասցնելու գործում:
