Կիպրոսի «Ազատ խոսք» համացանցային թերթի խմբագիր Երան Գույումճյանը, ամփոփելով 2013-ը, նշեց, որ տարին ընդհանրապես բավականին փոթորկահույզ էր մեր հայրենիքի համար:
Նրա խոսքով՝ գնալով ՀՀ իշխանության և հայրենի ժողովրդի միջև խորանում է վիհը, խորանում է նաև ընկերային բևեռացումը, մյուս կողմից՝ աշխուժանում է քաղաքացիական-երիտասարդական ըմբոստության ալիքը՝ մեր երկրից ներս կատարվող անարդարության դեմ, որոնք բազմաբնույթ են ու բազմազան: Սա, ըստ նրա, կարելի է համարել մեր երկրի ներսում ամենաուշագրավ ձեռքբերումը՝ քաղաքացիական գիտակցության, ոգու արթնացման:
«Հիշենք, օրինակ՝ Շանթի հեղափոխական քայլը, որ այդպես էլ մնաց անհետևանք, բայց ոչինչ էապես չի մնում անհետևանք…դրա շարունակությունը կամ արձագանքները դեռ տեսնելու ենք…»,- ասաց Երան Գույումճյանը:
Արտաքին ճակատում, նրա խոսքով, ՀՀ իշխանությունները շարունակում են իրենց պարտվողական քաղաքականությունը թե՛ Թուրքիայի նկատմամբ և թե՛ վերպետական կառույցների նկատմամբ, ինչպես դա տեղի ունեցավ սեպտեմբերին՝ ՀՀ նախագահ Սերժ Սարգսյանի՝ ՄՄ-ին միանալու միանձնյա որոշմամբ: Տխուր է նաև արձանագրել, որ մեր երկրի ներսում շարունակվում է աղետալի արտագաղթը, ինչպես նաև շարունակվում է Հայաստանի բնական պաշարների՝ հումքի, հանքի ահավոր կեղեքումը մի խումբ մենաշնորհ մարդկանց կողմից, որոնք հարստացնում են իրենց գրպանները՝ ի վնաս մեր ժողովրդի ու հայրենիքի:
Երան Գույումճյանի խոսքով՝ համակարգային փոփոխության հրամայականը օր օրի ավելի սուր է դառնում, փոփոխություն, որ էապես հիմնված է հայ հոգևոր-մշակութային արժեքների և ազգային գաղափարի վրա: «Այս գիտակցության արմատացումը մեր ժողովրդի ստվար զանգվածի մոտ կարող է վերջիվերջո նոր զարթոնք առաջ բերել մեր երկրի ներսում»,- ասաց նա:
Լուսանկարը` PanARMENIAN Photo-ի
