Երևանը բազմաթիվ խնդիրներ ունի, և եթե «Բարգավաճ Հայաստան» կուսակցությունը հաջողության հասնի Երևանի ավագանու արտահերթ ընտրություններում, մենք կսկսենք լուծել այդ խնդիրները: Այս մասին սեպտեմբերի 4-ին Երևանի ավագանու ընտրությունների ԲՀԿ ցուցակի թեկնածուների հետ հանդիպման ժամանակ նշեց ԲՀԿ նախագահ Գագիկ Ծառուկյանը:
«Առաջնայինը վերելակների խնդիրն է, երթուղային տրանսպորտի խնդիրը, բնակելի շենքերի, կանաչապատման խնդիրները: Եթե երևանցին մեզ վստահի ու տա իր քվեն, հաջողության հասնելու դեպքում հենց հաջորդ օրվանից սկսելու ենք լուծել բոլոր խնդիրները»,- ընդգծեց Ծառուկյանը:
«Բարգավաճ Հայաստան» կուսակցության ավագանու ցուցակի 1-ին համար Նաիրա Զոհրաբյանի խոսքով` իրենք, Երևանի խնդիրները լուծելով, այն դարձնելու են ապրելու քաղաք:
«Մեր ընտրվելու դեպքում Երևանից այլևս ոչ ոք ոչինչ չի գողանալու: Ես այս հարցում ավելի կոշտ եմ լինելու, քան ուժային կառույցները: Երևանը պետք է բոլորի համար դառնա ապրելու քաղաք»,- նշեց նա:
Կուսակցության ավագանու ցուցակի 2-րդ համար, հաղորդավար Պետրոս Ղազարյանը հանդիպման ընթացքում նշեց, որ իրենք իրենց նախընտրական ծրագիրը գրելիս խորհրդակցել են տեղական ինքնակառավարման արտասահմանյան մասնագետների հետ:
«Մի քանի օրից աշխարհի տարբեր մասերից Երևանում կժամանեն քաղաքապետեր, քաղաքապետարանների աշխատակիցներ և մասնագետներ, որոնց օգնությամբ էլ մենք մշակել և մշակում ենք մեր ծրագրերը: Դրանք մի շատ կարևոր առանձնահատկություն ունեն. բոլորը ֆինանսապես հիմնավորված են»,- նշեց Պետրոս Ղազարյանը:
ԲՀԿ նախագահի ու Երևանի ավագանու թեկնածուների խոսքով` իրենք նույնիսկ հաջողության չհասնելու դեպքում պատրաստ են ձեռք մեկնել հաղթած թիմին:
