1in.am Sport-ի հետ զրույցում 2013 թվականն ամփոփեց Արմֆայթինգ ֆեդերացիայի նախագահ Հայկ Ղուկասյանը:
«Չեմ կարող ասել, որ 2013 թվականը շատ լավ տարի էր: Ամեն դեպքում, քայլել ենք դեպի առաջ: Մասնակցել ենք շատ նշանավոր մրցաշարերի, հանդես ենք եկել պատվով, հաղթանակներ ենք գրանցել: 2011 և 2012թթ Հայաստանում մրցաշարերն ավելի շատ են եղել, քանի որ 2012թ. վերջում հարկային դաշտի փոփոխությունների, վերաբերմունքի համար մենք դադարեցինք միջոցառումներ անցկացնել: Մինչ օրս որևէ կազմակերպության կամ անհատի կողմից աջակցություն չենք ունեցել: 8 տարիների ընթացքում Արմֆայթինգ ֆեդերացիան ծախսել է իր սեփական միջոցները և շարունակել իր գործունեությունը:
2014-ին մարզադպրոց է բացվելու Գավառում, մարզիչները որակավորման փուլ են անցնում: Արմավիրի մարզում ունենք 8 մարզադպրոց, 4 մարզադպրոց մարզական գույք ստացավ Արմֆայթինգ ֆեդերացիայի կողմից, 4 մարզադպրոց հիմնանորոգվեց:
2014թ. մեզ սպասվում են մի շարք հետաքրքիր մրցումներ միջազգային մրցասպարեզում: Բանավոր համաձայնության ենք եկել UFC կազմակերպության հետ, և մնում է ստորագրել գրավոր պայմանագիր: Եթե դա ստացվի ապա Հայաստանը կունենա առաջին մարզիկը համաշխարհային UFC կազմակերպությունում: Հայաստանը կներկայացնի Դավիթ Խաչատրյանը:
Եթե դա տեղի չունենա, ապա մարտ-ապրիլ ամիսներին տեղի կունենա աշխարհի չեմպիոնական գոտու պաշտպանության մենամարտը: Մտադիր ենք ՀԱՕԿ նախագահ Գագիկ Ծառուկյանի հետ համաձայնեցնել, որպեսզի մենամարտը կայանա նրա բարձր հովանու ներքո՝ Մարզահամերգային համալիրում:
Այս տարի յուրաքնչյուր ամիս մեր մարզիկները բարձրացրել են Հայաստանի դրոշը: Նոր տարին կնշեմ տանը՝ ընտանեկան միջավայրում: Մեր մարզիկներին մաղթում եմ հաղթանակներ, երկրին՝ խաղաղություն: Թող բոլորն ապրեն լավ»:
